Vawiin aṭangin Khelo India Football

India rama University level inelna sang ber Khelo India University Games 2023 chu vawiin aṭangin neih a ni dawn. Mizoramin mipa football inelna a thleng dawn a, vawiin chawhma dar 9:30 hian RG Stadium, Mualpuiah hawn a ni ang.

Mipa football-ah hian team pariat an inlan dawn. Group A-ah Punjabi University, Patiala; Guru Nanak Dev University, Amritsar; University of Calicut, Kerala leh University of Calcutta te an awm.

Group B lamah Mahatma Gandhi University, Kottayam; Adamas University, Shivaji University leh University of Kerala te an awm thung. Tun ṭumah hian Mizoram University chu an tel phak lo a ni.

Group pakhata awm team palite an inkhel kual vek dawn a, chumi hnuah a sang pahnih ten semifinal an lut ang. Ruahman dan chuan February 27, Thawhlehniah a hmawr bawk tur a ni ang.

Sports Minister Lalnghinglova Hmar chuan, "Khelo India University Games 2024 chu India sorkarin a ngaihpawimawh a nih avangin Mizoram sorkar pawhin a ngai thutak hle a, inbuatsaihna pawh a hautakin Mizoram sorkar chuan theihtawp a chhuah a ni," tiin Vanglaini a hrilh.

Inelna thleng tur hian Mizoram sorkar chuan theihtawp a chhuah. Executive Committee for Khelo India University Games dinin - Sports and Youth Services minister Lalnghinglova Hmar chu Chairman a ni a, inbuatsaihna pawh an nei ṭha.

SYS director Lalnunhlua chuan, "Inelna hmachhawn turte tluang takin an lo thleng thei a, keini lamin kan theih leh thiam ang tawkin kan lo dawngsawng," tiin Vanglaini a hrilh a, nimin khan hmunhma an endik nawn leh a ni.

Khelo India University Games hi a vawi lina niin, tun ṭumah hian hmar chhak state pasarih ten an inthlen ṭawm. Assam chu a thlengtu pui ber niin, discipline 16 an thleng a, chungte chu athletics, rugby, basketball, volleyball, swimming, badminton, hockey, fencing, kabaddi, football (hmeichhia), tennis, mallakhamb, judo, table tennis, boxing (hmeichhia) leh shooting te an ni.

State dang paruk - Mizoram (football - mipa), Arunachal Pradesh (weightlifting), Meghalaya (archery), Sikkim (boxing - mipa), Nagaland (wrestling) leh Tripura (Yogasana) ten discipline pakhat ṭheuh an thleng a; Manipur erawh ram buai vangin inelna an thleng ve thei lo a ni.