Liverpool & Arsenal lawm nan City leh Chelsea an inhnehtawk!
Inrinni zan Premier League inkhelah Liverpool chuan 4-1 ngawtin Brentford an sawp a, hliam damkar Mohamed Salah chuan goal khung lehnghalin, Darwin Nunez, Alexis Mac Allister leh Cody Gakpo ten goal an khung bawk - Premier League table chung ber an luah chhunzawm.
An elpui Liverpool chak thu hre sain Inrinni zan khan Manchester City an inlan a, an mikhual lakah point hlawh chhuak turin vanneihna an mamawh. Emirates Stadium-ah team pahnih hi 1-1 in an inhnehtawk.
Raheem Sterling chuan minute 42-naah Blues tan goal hmahruai a khung a, amah duh tawh lotu Pep Guardiola chu thinrimin a zuantir. Mahse, hun tawp nan minute sarih chiah a awm tawh tihah City vanneihna a her chhuak a, Rodri chuan si phurh sutna goal a khung.
City-in point an hlawh chhuak hram a, hmahruaitu Liverpool chu point liin an phak lo mek - match khatin khel tlem mah se, an khel kim a, an chak a nih pawhin Reds hi point khatin an la thlau dawn tho tihna a ni a, Liverpool tan result lawmawm a ni.
An duh loh kha
Liverpool leh Arsenal chak thu hre sain City an inlan a, chak an mamawh tih an hai lo - mahse, Pep Guardiola team hian ball chang tam mah se, an duh ang ngawtin goal an khung thei lo a, Chelsea-in ball an chan ruala na taka an nawr let ṭhin avangin an talbuai viau bawk.
Blues hian counter-attack aṭangin goal an khung ta nge nge a, Nicolas Jackson-a ball pek chu Sterling hian a khelhpui ṭhin Kyle Walker bum nan a hmang a, City keeper Ederson tana man rual lohin goal-ah a chantir zui.
Sterling hian goal khung belh theihna chance pawh a nei a, mahse, Malo Gusto siamsak chu goal-ah a chantir thei lo. Tun season-a che chhe tak Chelsea hian City lakah an tlarhnung an veng ṭha a, Manchester khaw club hi goal hmaah an vanduai ve bawk.
Mahse, an vanduai reng bik lo - minute 83-naah Rodri a inlar a, tun hnaia City hlawhtlin nana thawhhlawk tak midfielder hian si phurh sutna goal a khung. Hun tawp thlengin goal dang a lut lo a, 1-1 in inkhel a tawp a, vannei zawk chu City an ni.
A har a ni!
City-in vawi 31 zet shot an nei a, mahse, heng zinga panga chiah hi target zawnah a kal avangin uang thei an ni lo - tlarhmaah goal khung nuam ti Erling Haaland chet fuh zan a ni lo a, Norwegian striker hian ni danga a khung ṭhinnaah a khung thei tlat lo.
Kevin de Bruyne-a cross duhthusam ang hiala chhal theih a tauh goal lohte chu Haaland fuh loh zan a nihzia pholangtu a ni a, Julian Alvarez siamsak a tauh goal loh te, Phil Foden-a hun remchang siamsak a chhawr lohte pawh a sawi zui ve ngei ang.
City hian an vanduaina zawn an thlir chuan Kyle Walker-a penalty beisei pek a ni lo te, Levi Colwill- handball en liam a nite chu an ui vawng vawng ang a, video assistant referee inrawlh chunga an beisei pek an ni lo chu chak loh chhuanlam atana hman tham a ni.
Blues-in shot nei tam tawk lo mah se, counter-attack ah an hlauhawm ṭhin a, Sterling bakah Nicolas Jackson chuan a hun ṭha uiawm takin a hlah ve tho. A tawi zawnga sawi chuan Chelsea-in point hlawhchhuah an phu a, an phu ang ngeiin point khat nen an haw.