Mohamed Salah a dam leh ta

AFCON khelin a thang bo a, a inhliam zui. Mahse, Mohamed Salah chu 'Salah' a lo la ni reng a, a inhliam hnua a inlan leh hmasak berah goal a khung nghal - Reds hian Brentford chu khualmualah 4-1 ngawtin an sawp.

Minute 35-naah Darwin Nunez chuan goal hmahruai a khung a, Gtech Community Stadium-a Uruguayan striker goal khung hi goal mawi bik a ni a, Brentford keeper Mark Flekken a 'chip' khum dan chu striker class sang ke aṭanga chhuak a ni.

Player inhliam ngun ve tak Diogo Jota chu minute 44-naah lakchhuah a ngai zui a, mahse, Reds tan lawmna thlentu a chang zui. Jota thlak turin Salah a lut a, a tirah erawh a hriam nghal bik lo.

Luis Diaz siamsak a chhut sual a, hnai set sawt aṭangin uiawm takin a hlah bawk. Mahse, minute 55-naah Alexis Mac Allister khung tur a siamsak a, minute 68-naah a khung ve leh zui bawk - tun season inelna hrang hrangah match 28 khela goal 19 khungin, assist vawi 10 a nei tawh.

Salah hian Premier League match 30-ah goal leh assist a nei kawp ta a, Wayne Rooney (36), Thierry Henry (32) leh Alan Shearer (31) te chiah tluk loh a nei tawh.

Egyptian forward goal khung hnuah Ivan Toney chuan si phurh a sut ṭhen ve a, mahse, Cody Gakpo chuan khung lehin, a tawpah 4-1 in Liverpool an chak. Mahse, Reds lawm a kim lo a, Jota bakah Curtis Jones leh Nunez chu hliam vanga lakchhuah an ngai.

Liverpool boss Jurgen Klopp chuan, "Kan tana a pawizia hre turin kan la nghah hret a ngai. Curtis hian a ke na a ti deuh a, ani meuhin na a tih chuan a na viau ni turah ka ngai. Diogo dinhmun a ṭha lo berah ka ngai a, sawi chian theih erawh a la ni lo.

"Darwin pawhin na a nei a, inven nan kan la chhuak," a ti a, Curtis Jones leh Nunez bik hi chawlh rei ngai lo tura ngaih a ni - anni bakah hian Trent Alexander-Arnold, Dominik Szoboszlai, Alisson leh Thiago Alcantara te chu hliam leh damlohna avangin an chawl mek bawk.

Liverpool hian February 25 zanah Chelsea nen League Cup final an khel dawn a, Nilaini zan hian Luton Town chu Premier League match khel turin an mikhual bawk ang.