MSL 9 a hmuhnawm zel

Tualchhung basketball inelna lian - Mizoram Super League season 9 an khelh chhunzawm a, team an inthlauh loh avangin inkhel a hmunawm thei hle - zanin hian a hmun ngai R. Dengṭhuama Indoor Stadium, Mualpuiah khelh leh a ni ang.

Champion lai Khatla TBL chuan Inrinni zan khan Champhai BC chu 86-79 in an hneh. TBL an chak theih nan point 33 neitu Vanlalṭhazuala a thawhhlawk fal - Ṭhazuala hi season hmasa lam aṭanga buaipui ngai tawh kha a ni.

An match hmasa berah chak lo mah se TBL an insiamṭha leh tawh. February 21, Nilaini zanah Chanmari Vikings nen an inkhel leh ang. Champhai erawh an bul ṭan fuh an chhawm nung thei ta lo, anni hian an match lehpekah chuan Zarkawt BCA an tum dawn.

Bungkawn LB Associates pawh khel ṭha viau ṭhin mah se, team ṭha Zarkawt BCA hneh tur chuan an la ṭha tawk lo deuh. BCA hian LB hi 104-89 in an hneh a, inelna neih laiah Lalrina Renthlei awmna BCA hi an la chak kim vek.

MSL team pariatte vawi thum ṭheuh an inlan tawh a, a chung berah point ruk neitu Zarkawt BCA an awm. Team dang pali - Bungkawn, Hotshots, TBL leh Champhai ten point nga ṭheuh neiin, an hnuaiah Nursery leh Venghlui VR4 te an awm.