Leverkusen an kang sang zel

Bayer Leverkusen chuan a vawi khat nan Bundesliga champion nih an la tum zel a, tunah chuan German football inelna sang berah hian point riatin an sang fal ta, hmabak erawh a la thui dawn hle.

Xabi Alonso enkawl Leverkusen hian Inrinni zan khan FC Heidenheim chu 2-1 in an hneh. Nizan khan champion lai Bayern Munich an inlan a, an inkhel result a zirin an inkar hi a la zim leh rih thei bawk.

Leverkusen tan Jeremie Frimpong leh Amine Adli ten goal an khung a, mualneitu lamin hun tawp dawnah Tim Kleindienst hmangin sut ṭhen ve mah se awmzia a nei thei tawh lo, khualmualah Alonso nauten point thum an hmu.

An match hnuhnung 32 zetah Leverkusen hi an tlawm ta lo, tlawm loa kaltluan rei lamah Bayern Munich an nih rual ta chiah. Hansi Flick enkawl Bavarians kha kum 2019-2020 inkar khan match 32 chhung tlawm loin an lo kaltluang tawh.

German rama football inelna sang berah hian Leverkusen hi an la champion ngai lo. Kum 1996-97, 1998-99, 1999-2000, 2001-02 leh 2010-11 te khan pahnihna an lo ni tawh, tun ṭumah hian thawnthu ziah danglam an tum mek a ni.