Snooker champion Lalsangzela

Mizoram Snooker & Billiards Association (MSBA) buatsaih - Mizoram 6 Red Snooker Championship Tournament 2024 chu Inrinni zan khan MSBA Hall, Hawla Indoor Stadium-ah a hmawr bawk a ni a, Lalsangzela, Khatla South chu a champion.

Mizoram 6 Red Snooker Championship 2024 hi Lalsangzela leh T. Lalṭanpuia, Upper Republic te'n tlai dar 6:00 atang khan final an khel a. Race to 6 a khelh niin, zan dar 8:50 vel khan match zoin, Lalsangzela hi 6-2 in a chak ta a ni.

Inelna hi hi February 12 tlai aṭang khan khelh ṭan a ni a, snooker table paliah a ruala khelh ṭhin niin, tlai dar 4:30 aṭanga zan dar 9:00 thleng match a awm ṭhin. Mizoram 6 Red Snooker Championship 2024-ah hian player 31 an tel a, Zaithangpuia, Siaha tih loh chu Aizawl mi vek niin double elimination hmanga khelh a ni.

Semifinal-ah Lalsangzela'n K. Lallawmkima chu 5-0 in a hneh a, inkhel dangah T. Lalṭanpuia chuan Lalbiaksanga lakah 5-3 in hnehna a chang ve bawk.

Lalsangzela hi Mizoram Snooker & Billiards Association (MSBA) buatsaih, kumin Janaury thlaa khelh zawh tak 'Mizoram State 6 Red Snooker Ranking 2024' ah khan a lo champion tawh bawk a ni.