Filling station-a thawkin Covid-19 a vei avangin veng tam tak an buai

Zangena Filling Station, Ramhlun North-a thawk pakhatin Covid-19 a vei tih nimin khan hmuh chhuah a ni a, hripui hi khawi aṭanga kai nge hriat a ni lo. Pump hi mi tam takin an tlawh a nih avangin a nghawng a zau a, Aizawla veng hrang hrangin an buaipui zui.

Sorkar thuchhuah tarlanin, Zangena FS-a thawk kum 23 mi, Zemabawk North-a cheng chuan Covid-19 symptom a neih avanga inringhlelin, Rapid Antigent Test (RAT) hmangin a swab sample a endiktir a, hripui a vei tih hmuh chhuah a ni. Amah hi Covid-19 veite enkawlna hmunah dah nghal a ni.

Zangena pump neitute aṭanga thu dawn danin, Covid-19 vei hmuh chhuah tâk hi nimin (Ningani)-ah pawh hnaah a la kal a, nimin khan a khua a sik avangin hawtir a ni. An veng, Zembawk North Local Task Force hruaitute hriattir an ni a, anni hmalaknain RAT hmanga endik nghal a ni.

Zangena FS neitute chuan, Covid-19 vei tih hmuh chhuah tâk chu tanker driver-te lo dawngsawngtu a ni lo tih sawiin, "Khawi aṭanga kái nge kan hrethiam bik lo," an ti. Nimin khan he filling station-a hnathawk dang pasarihte hi RAT hmanga endik nghal vek an ni a, an zavai hian Covid-19 an vei lo (negative) tih finfiah a ni.

He thil thleng avang hian Aizawla veng hrang hrang local task force-te chuan an veng mi leh sa tun hnaia Zangena Filling Station-a kalte chu in report turin an hriattir a; sorkar pawhin AMC area chhunga total lockdown a puan chu August 24 zing dar 4:30 thleng a pawt sei.