Goal hmaah Hojlund a hmui ta

Manchester United striker, pound maktaduai 72 man Rasmus Hojlund-a'n nikum Krismas thleng pawhin Premier League-ah goal a la khung lo a, Krismas ruai ṭheh ni aṭanga goal khung ṭanin league match rukah a zawnin goal a khung ta.

March 18, Pathianni zan khan Erik ten Hag-a hoten Luton Town 2-1 in an hneh a, match 25 aṭangin point 44 hmuin palinaa awm Aston Villa chu point nga chauhin an pha tawh lo.

Goal khung thei 'Hojlund'

Man United hian Kenilworth Road-ah Luton Town an tlawh a, Hojlund hian second 37-na lekah a khung nghal. Luton defender Amari Bell-a tihsual ni bawk mah se Hojlund hian goal khung turin hna a la ngah a, a ke vei lamin vawi thum a khawih a, keeper Thomas Kaminski tan tih theih a tlem hle.

Minute sarihnaah goal hnihna a khung lehnghal a, Alejandro Garnacho ball pet kawh ṭha zet chu a awm (chest) hmangin goal-ah a chantir. Goal hnihna khung turin Hojlund-a'n vanneihna a mamawh a, chutihrualin goal khung tam striker-ten goal ṭha vek an khung lo tih hriat a ṭha.

Hojlund-a'n match ruk chhung a zawna goal a khung tak avangin United legend Cristiano Ronaldo, Ruud van Nistelrooy leh Eric Cantona te huangah a dah tel theih. Luton laka Hojlund-a goal khung hi Premier League-a Man United tan khualmuala goal khung rang ber a ni.

Danish striker hi kum 21 leh ni 14 mi chauh a ni a, Newcastle United forward Joe Willock record khumin a zawna league match ruka goal khung thei naupang ber a ni. Man United hian February 24, Inrinni zanah Fulham an mikhual dawn a, Hojlund hian a record hi a belhchhah thei ang.

Tlarhnung pawp

Man United-in minute sarih chhungin goal hnih an khung tawh a, Premier League kai thar lakah awlsam taka chak thei tura ngaih an ni. Mahse, minute 14-na lekah Luton-in captain Carlton Morris hmangin si phurh an sut ṭhen.

United academy chhuak Tahith Chong-a'n box chhungah ball changin, goal-ah a pet. Hemi per hi Morris-a'n a nang fuh hmasa ber a, keeper Andre Onana dan hman lohin a tauh lut. Goal khat hian Luton beiseina a siam a, Alfie Doughty-a'n box chhung chiah aṭangin goal pawnah chiah a pet out.

Team ṭha zawk Man United hian Marcus Rashford leh Bruno Fernandes te hmangin goal thumna khung theihna remchang an nei a, an khung si loh avangin a tawp thlengin Luton-in beiseina an neih phah. Ross Barkley-a'n hun tawp dawnah crossbar chunglam a tauh per a, Man United an him hram.

Engtin zel?

Man United-in neitu thar an nei a, khelmual pawn boruak a ṭha ṭan. Hei hian khelmual chhungah pawh result ṭha a thlen a, season thara Champions League khel turin hmasawn zel erawh an mamawh.

Dutch manager Erik Ten Hag chuan, "Tunah chuan Champions League khel thei tur zingah kan telin ka hria. Kan tan chuan eng game pawh hi final ang maia pawimawh a ni," tiin a sawi.

Tun hnaia Man United che ṭhat chhohnaah hian kum lama upa player Casmerio aiin kum 18 mi Kobbie Mainoo a pawimawh zawk a, Ten Hag-a pawhin result ṭha neih chhunzawm turin thutlukna huaisen a siam chhoh ngam a ṭul ang.