MFA kutah Best Grassroots Award

All India Football Federation (AIFF) in Mizoram Football Association chu AIFF Grassroots Awards 2023-24 a buatsaihah a ti ṭha ber - Best State Football Association chawimawina a hlan.

AIFF Secretary General lailawk M. Satyanarayan chuan Mizoram FA hnenah he Award hi rawn thawnin, "India rama Grassroots Football in hma a sawn theihna tura chawl lo a inthawhna hian in state mai bakah, rampum huapin nghawng duhawm tak a nei dawn a ni," a ti. Mizoram Football Association hmasawnna chu Indian Football hmasawnna tichaktu pawimawh tak a ni, a ti bawk.

All India Football Federation-in a bulṭhut aṭanga football hmasawnna atana hma a lakna kal mekah hian Mizoram FA chu ralbang mai lo a, theihtawp chhuah chhunzawm zel turin AIFF chuan a rawn ngen bawk.

Hetihlai hian Mizoram FA-in Reliance Foundation nena an kalpui mek Naupang League chu Grassroots Awards-ah hian Best Social Initiative nominee zingah a telh bawk a ni. Kum 2013 khan MFA hi AIFF chuan Grassroots Development a tiṭha ber chawimawina (award) a lo hlan tawh a ni.

Mizoram Football Association hian Tata Trusts thawhpuiin Zoram dung leh vanga Centre 60 zetah Grassroots Football a kalpui a, Education Department hnuaia Samagra Shiksa thawhpuiin Centre 13-ah naupang football zirtirna a kalpui bakah Aizawlah naupang football zirna Centre pakhat a kalpui bawk.

Mizoram Football Association hian Reliance Foundation Youth Sports (RFYS) nen District pali - Aizawl, Lunglei, Champhai leh Kolasib ah Inter School/College inelna U13, U15, U17, U19 & U21 tan a buatsaih a. Reliance Foundation Young Champs (RFYC) nena thawk dunin Naupang League a kalpui bawk a ni.

Reliance Foundation Development League (RFDL) nena thawk dunin Under 21 tan inelna a kalpui mek bawk a. He inelnaah hian U23 mi panga tel theih niin, Mizoram aṭangin team pahnihte National Qualifiers-ah an tling chho ang a, chuta tiṭhate chuan English Premier League Academy-te telna Next Gen Cup an khel thei dawn a ni. RFDL hnuaiah hian Aizawlah team pangate an inel mek a ni.