Aizawlah Khelo India an ṭan

Khelo India University Games 2023 mipa football chu nimin aṭang khan RG Stadium, Mualpuiah khelh ṭan a ni. Inelna hi February 27 thleng neih tura ruahman a ni.

Mizoramin a thlen Khelo India hi sports minister Lalnghinglova Hmar chuan a hawng. Tetea Hmar chuan, "Khelo India University Games hnuaia infiamna peng hrang zinga mipa football kan thleng hi a lawmawm, a buaipuitu mi hrang hrangte inpekna a fakawm hle.

"India ram hmun hrang hrang aṭangin kan ram nuam tak, sik leh sa nuam leh boruak thiang takah mikhual inlo kal khawm a, nuam ti taka infiamna hmachhawn turin ka duhsak che u," a ti. Mizo mipuite chu ṭha taka mikhual thleng turin a lo chah tawh bawk.

Mizoram Football Association honorary secretary ni bawk Tetea Hmar chuan, "India rama football tuipuina leh player nei ṭha Kerela, Punjab, W. Bengal leh Maharashtra aṭangin player an lo kal khawm a ni a, infiamna hmangin inunauna ṭha kan lantir ngei ang.

"Tun laiah chuan football hi infiamna chauh a ni tawh a, in unauna thlentu leh mi tam tak tan chuan eizawnna ṭha tak a ni tawh," a ti. Infiammite chu an thlenn chin aṭanga hmasawn tur leh ram pum huapa hming lang turin a fuih bawk.

Mipa Football-ah hian team pariat - Mahatma Gandhi University; University of Calicut; University of Kerala; Punjabi University; Guru Nanak Dev University; Adamas University; University of Calcutta leh Shivaji University Maharastra te an inlan a, group pahnihah ṭhen hran niin an inkhelh kual vek hnuah a sang paliten semifinal an khel ang.

Khelo India University Games 2023 hi hmar chhak state ten an inthlen ṭawm a, a thlengtu pui ber Assam chuan infiamna peng 16 an thleng a, state dangte chuan infiamna peng pakhat ṭheuh an thleng. Manipur erawh an state a buai avangin inelna an thleng ve thei lo a ni.

Sports and Youth Services director Lalnunhlua chuan, "A tira ruahman dan chuan Khelo India University Games hi February 18 aṭanga khelh tur kha a ni a, mahse Pathianni a nih avangin Mizoramah chuan vawiin aṭangin kan khel. Hun chep tak karah Mizoram sorkar chuan Khelo India thleng tur hian theihtawp a chhuah a, hmunhmate duhthusam chiah lo lai deuhte awm mah se, a theih anga ṭhain an dawngsawng," tiin Vanglaini a hrilh.

Mipa football bikah hian infiammi 175, team enkawltu mi 25 leh midang ṭawiawmtu mi 70 bawr vel an lo kal a ni.