Haaland goal khung hun?

Erling Haaland a dam tawh a, a chamtu chu Kevin de Bruyne a ni bawk. Manchester City ralthuam pahnih hi hlauhawm viau mah se Chelsea lakah an che hleithei lo - zanin dar 1:00 hian Brentford an tum dawn, goal khung ngei an tum tawh ang.

Premier League champion lai Man City hi season kal laiah an chesual zing ve ta hle, vawi thum tlawm tawhin ṭum nga ngawt an khingpuite nen an inhnehtawk tawh bawk; nomawi humhim an duh a nih chuan holam taka point hloh a tih chi tawh loh.

Pep Guardiola tan sa huai ser ve reng a ngai tawh, point thum an hmu a nih pawhin Liverpool hnuaiah an awm a ngai dawn, chuvangin point hloh phei chu an ngaihtuah ngam lo ang - point thum hmuh erawh thil awlsam tak a ni bik lo mai thei.

Blues nen an inkhelh ṭumin goal khat an chhuah a, goal dang an chhuah lo kha an vannei. Man City defender-te hi an tawlh hma nasa ṭhin, goalkeeper leh defender inkarah hmun ruak zau a tam ṭhin avangin chetsual theih tak a ni.

Brentford hian Citizens ṭhat tawk lohna lai hi an hre ngeiin a rinawm, striker ṭha Ivan Toney an neih bawk avangin City tlarhnung tan fimkhur a ngai dawn. English striker hi Reds laka an tlawm chung pawha goal khung hramtu kha a ni tlat, ngaihthah a thiang lo ang.