Inter Milan khelmualah Atletico Madrid

Champions League round of 16 first leg chu zaninah khelh chhunzawm a ni dawn a, Inter Milan khelmualah Spanish club ṭha Atletico Madrid an lenglut dawn - a hmuhnawm ang.

Inter Milan hi Serie A hmahruai mektu an ni a, Italian top flight league-ah champion lo tur chuan an chetsual fe a ngai tawh. Hetihlai hian Atletico erawh league lama beisei phak lo an ni.

Chutihrual chuan engtiklai mahin Atletico hmachhawn hi thil châkawm a ni ngai lo a, Inter hian awlsam tura an ngai a nih chuan an tisual ang - zanin dar 1:30-ah San Siro boruak a 'hot' dawn.

Zanin dar 1:30-ah vek last 16 match dang a awm dawn bawk a, PSV Eindhoven chuan Borussia Dortmund an mikhual ang - hei pawh inkhel hmuhnawm beisei a sual lo ang.

An hming Inter

Season hmasa khan Inter Milan-in Champions League final an lut a, mahse, Manchester City an ngam lo. Mahse, he team hian hnual phah nan an hmang duh lo a, season hmasa aiin an ṭha zawk em ni chu aw, tih mai tur an ni.

Serie A-ah hma an hruai mek a, Juventus leh AS Roma a zawna an hneh hnuah, an league match hnuhnung berah Salernitana chu 4-0 ngawtin an sawp a, point kua laiin hma an hruai fal mek - Atletico tan thu hriat nuam a ni lo.

Tlarhmaah Lautaro Martínez a hriam reng a, tun season-ah match 31 aṭangin goal 23 a khung a, assist vawi nga a nei. A kawppui Marcus Thuram hian match 33-ah goal 12 leh assist vawi 11 a nei bawk - player pahnih hi Atletico tan ven uluk an ngai dawn.

League match hnuhnung bera chawlh hahdamtir wing-back pahnih Matteo Darmian leh Federico Dimarco te pawh inkhel turin an inpeih a, midfield-ah Hakan Calhanoglu a hnawksak leh viau bawk ang.

Hei le Atletico

Khawvela coach hlawh hnem ber Diego Simeone rorumzia sawi nawn a ngai lo a, Argentine coach hian ṭi dukin Inter khelmualah a team a luhpui lo ang tih chu thil chiangsa a ni - inkhel a hmuhnawm loh ring suh.

Sevilla an ngam loh hnuah inrintawkna nei turin Atletico Madrid hi chiang takin an chak a, Las Palmas chu 5-0 in an sawp. Marcos Llorente leh Angel Correa ten goal hnih ve ve khungin, Memphis Depay chuan goal khat a thawh bawk a, he team hian goal khung tur an nei.

Hetihrual hian tlarhmaa chhuanvawr Alvaro Morata chu Sevilla lakah hliam vanga lakchhuah a ngai a, tun season-a goal 19 khung tawh striker hi zaninah a inlan theih dawn leh dawn loh a la chiang lo.

Mahse, Atletico hian Antoine Griezmann an la nei cheu - tun season inelna hrang hrangah match 35 khela goal 18 khungin, assist vawi sarih a nei a, Inter Milan tan French forward dah ṭhat hi Atletico dan chahna ṭha tak a ni dawn.

Ṭhian hlui

Inter enkawltu Simone Inzaghi leh Atletico boss Diego Simeone te hi Lazio tana lo khel dun tawh ṭhin an ni a, zaninah ṭhian hlui pahnih hian a chungnung zawk nih an inchuh dawn - hmelhriat ṭha nihna dah ṭhat hun a ni.

Inzaghi chuan, "Atletico hian tharum an ngah a, an thil tih an hrechiang. Player ṭha tak tak an nei a, coach ropui takin a enkawl bawk - kan khelh ho lai pawha player ṭha tak a ni," tiin an khingpui tur team a fak.

Inter hian tun season-ah Supercoppa Italiana nei tawhin, season hmasa an champion-na Coppa Italia-ah erawh an tla tawh a, Serie A nomawi leh Champions League an la beisei thei - an beiseina hi a thamral loh an duh dawn.

Hetihlai hian Atlético Madrid champion châkna a nep lo - La Liga-ah beisei an phak loh avangin Copa del Rey leh Champions League chu champion an beiseina tia sawi theih a ni a, chumi tur chuan Inter Milan paltlang ngei an tum ang.