Mizoram hmatawng Sawmfela, MC-a leh Dawngtea

FIFA Santosh Trophy-ah Mizoramin tlarhma lam player an thlak hlawk. Group stage-ah Lalkhawpuimawia (Mapuia), PC Lallawmkima leh Suanngaihmuana te an awm a, tun ṭuma Mizoram tlarhmaa awm tur chu Malsawmfela, MC Malsawmzuala leh MS Dawngliana te an ni.

An tel tawh lo!

Mizoramin final round an thlen theih nan Kelkang striker Mapuia'n goal riat a khung a, group stage pum puiah top scorer a ni. MPL10-a Chanmari FC tana khel Mapuia hian January transfer-ah Bengaluru United a zawm avangin tun ṭumah hian a tel thei tawh lo.

Samtlang tlangval PC Lallawmkima hian Services a champion pui tawh a, group stage-ah Pondicherry lakah hattrick a siam a, tunah a hnathawhna lamah a kir leh tawh. Suanngaihmuana hi khup hliam vangin harsatna a tawk a, Pondicherry lakah minute nga lek lutin a luh chhungin goal hnih a lut hman. Amuana hian theihna a nei sang a, mahse a khup hliam enkawl a ngai rih thung.

Tawnhriat ngah zawk

Mizoram tan Mapuia, Amuana leh PC-a te awm tawh lo hi chânna lian tak a ni thei a, chutihrualin tuna Mizoram team tlarhmaa inlan turte hi tawnhriat ngah zawk an ni. Malsawmfela hi qualifying-ah khan kal tura ngen ni mah se ṭangthar zawkte a kian. Tun ṭumah erawh group stage-a mi forward pathum bakah Electric Veng FC captain Lalhriatpuia'n Aizawl FC a zawm leh tak si avangin koh nawn leh a ni.

Ramhlun South striker Sawmfela ṭhatzia chu tualchhung football hrechiangtute chuan an hre vek. MPL3-ah best forward a ni tawh a, MPL5-ah best player leh best forward ni lehin MPL-a nomawi la chawi ngai lo Mizoram Police chu a vawi khat nan a champion pui bawk.

Bawngkawn forward MS Dawngliana hian qualifying round-ah team training a zawm vek a, final squad-ah tel mah se chhungkaw harsatna avangin a kal leh thei ta lo. Dawngtea hi MPL hmasa ber top scorer a ni a, MPL2 leh MPL7 best forward a ni bawk.

Siaha forward MC Malsawmzuala hi group stage-ah khan MPL10-ah match khat chauh a inlan avangin koh a ni lo a, final round khel thei turin player 40 zingah erawh dah tel a ni. MC-a hian MPL9-ah khan Chawnpui FC a champion pui a, top scorer leh best forward a ni. MPL8-ah Chhinga Veng tan khelin top scorer a ni bawk a, a sulhnu hian a theihna sang tak a pholang.

Mizoram vanduaina erawh tun ṭuma Mizoram tana rinrawl ni thei tur Lalnunzama chu training-naah a inhliam a, Laipuitlang tlangval Zama hian Khelo India-ah Mizoram a champion pui tawh a, a awm lo tur hi Mizoram tan chânna lian tak a ni ang.