Bayern an tlawm leh tawh!

Tun hnai ni kua lek chhungin Bayern Munich chu vawi thum an tlawm ta. Harry Kane awmna Bavarians tan Bundesliga nomawi chawi tur chuan Bayern Leverkusen chetsual chan ngar ngar a ngai tawh dawn tihna a ni.

Thomas Tuchel-a naute hian VfL Bochum chu 3-2 in an hneh lo. Mikhual Bayern hian Jamal Musiala-a goal ṭha tak hmangin hma an hruai a, mahse chawlhlawk hmain Bochum lamin Takuma Asano leh Keven Schlotterbeck te hmangin an chhanglet.

Second half-ah defender Dayot Upamecano chuan ball kang an inchuhna lamah a kut a thawh avangin yellow card pahnihna a hmu a, hnawhchhuah niin penalty a chawi - Kevin Stoger cuan 3-1 a an hmahruaina a khung.

Hun tawp dawnah Kane-a'n hun tawp dawnah tun season a league goal 25-na a khung a, mimalin goal khung thei viau mah se a team Bayern hi an dinhmun a ṭha tawk lo a, beisei bo erawh an la ni bik lo.

Bayern Munich hi tun hnai season 11 chhung chu Bundesliga-ah an champion, champion duha tuihal Kane-a'n a pan duh chhan pawh a ni. Mahse, tunah chuan champion ṭhin kha champion lo thei dinhmunah an ding mek.

August thla khan season khuh hawn nan nomawi chawi nghal theih an nei a, mahse German Super Cup an la phak lo. German Cup second round aṭangin an tla a, an hneh loh hi third division club Saarbrucken an ni.

Champions League last 16 an match hmasaah Lazio chu 1-0 in an ngam lo, anmahni khelmual Allianz Arena-ah an la intawng leh dawn - Bundesliga lamah chuan khelh zat inangah Leverkusen aiin point riatin an hniam.

A hma hun an zawhna chhangin Bayern coach Tuchel chuan, "Inkhelha chak loh hi chuan hetiang boruak hi a awm ziah, thil thar a ni lo," a ti. German coach hi a hlauthawng lo a, chutihrualin a hma hun a chiang lo tih erawh thup theih a ni lo.