LPS Cup A hun a thleng ta

Mahindra XUV 300 LPS Cup Inter Village Football Tournament 2024 chu vawiinah khelh ṭan a ni dawn ta - Aizawl DFA hnuaia khua leh khua, veng leh veng inelnaah hian team 62-in inelna an hmachhawn dawn.

Aizawl khawpui chhung aṭangin team 41-in inelna hi an hmachhawn dawn a, Aizawl pawn aṭangin team 21, district dang aṭanga sawm bik pali an tel dawn bawk - a ṭantirh aṭangin boruak a 'hot' chho nghal ang.

Vawiinah hian match khelh tur pathum a awm dawn a, zing dar 10:00-ah tualchhung football inelnaa sulhnu nei ṭha Armed Veng leh Nursery Veng an intawng dawn - inkhelhna tur hmun hi 1st Bn MAP Ground, Armed Veng a nih avangin mualneitu hian ṭantu an nei ṭha dawn.

Veng mipui puihna nen Armed Veng hian result ṭha neih an tum dawn a, Nursery vengten an player-te ṭantu nei loa an awm phal loin an ṭawiawm ṭhat a rinawm - boruak a 'hot' nghal viau tura ngaih a ni.

Chhun dar 12:00-ah sulhnu nei ṭha leh, ADFA hnuaia Inter Village Football Tournament hnuhnung ber, kum 2019-a final lut Republic Vengin Bungkawn an hmachhawn dawn a, chak ngei an tum ang.

Chawhnu dar 2:00-a Sairang leh Falkawn inkhel tur pawh hi en tlak viau tura ngaih a ni a, vawiin inkhel zawng zawng hi 1st Bn MAP Ground, Armed Vengah vek khelh a ni dawn.