Real Madrid an chelh ding

Spanish La Liga hmahruaitu Real Madrid chuan Pathianni zan khan Rayo Vallecano an lenchilh a, coach thar Inigo Perez hoa khel Vallecano khelmualah hnehna an chang zo lo; 1-1 in an inhnehtawk a, Barcelona leh Girona an lawm khawp ang.

Inrinni zan khan Barcelona hian khualmualah Celta Vigo chu 2-1 in an hneh a, inchhuang thei erawh an ni lo - hun pek belh minute sarihnaa Robert Lewandowski-a penalty hmangin 2-1 in an chak.

Lewy hian goal hnih khungin, Celta Vigo tan Iago Aspas chuan goal khat a khung ve bawk. Barca an chak hram a, a tuk zanah Real an chak zo lo thung - Catalan club ṭantute tan chuan kartawp duhthusam a ni.

Barca hian point riat ngawtin Real hi an la thlau tho a, nizan khan pahnihna Girona-in Athletic Bilbao lenchilhin an result kan hre hman lo - an chak chuan point thum chauhin Real an thlau ang.

A goal hma

Real-in khualmualah goal khung turin an nghah rei a ngai lo a, Joselu chuan minute thumna lekah Fede Valverde-a ball pek ṭha zet chu goal hmahruai ni turin a khung - eng zat takin chak ang maw? tih chu zawhna a ni.

Mahse, Real beisei angin thil a kal vek thei bik lo a, Vallecano an ṭang ve thei tlat. Minute 27-naah penalty an hlawh chhuak zui a, Eduardo Camavinga handball vang a ni - a tirah referee-in hmu lo mah se video assistant referee (VAR) a inrawlh.

Referee-in penalty spot a kawk zui a, Raul de Tomas chuan harsatna nei loin goal-ah a chantir. Hun tawp thlengin goal dang a lut tawh lo a, champion tum Real-in point khata lungawi an zir a ṭul.

Real hian hliam vangin an thiampuipa, England midfielder Jude Bellingham an chhawr thei lo chhunzawm a, Carlo Ancelotti tan nomawi chawi turin kum 20 mi midfielder hi a dam ṭhat vat a pawimawh.

An zuam sual

Real hi Champions League round of 16 first leg khel zo hlim an ni a, RB Leipzig an hneh hram. Coach Ancelotti-a'n Vallecano khelmual hi player ṭhenkhat chawlh hahdamtir nan a hmang a, Toni Kroos, Rodrygo leh Dani Carvajal te chu bench-ah a dah vek!

Mahse, King Carlo meuh pawh a chesual ve thei tih a lang a, minute 70 thlenga goal dang an khung loh meuh chuan player pathum hi bench aṭangin an lut vek - Kroos hian freekick aṭangin chance duhawm zet a nei a, mahse, Rayo keeper Stole Dimitrievski chuan ṭha zetin a dang.

Dani Carvajal pawhin goal khungna chance a nei a, mahse, goal ni loin red card zawk a hmu - hun pek belhah Spanish defender hian a yellow card pahnihna a hmu a, hnawhchhuah a ni.

Kum 36 mi Inigo Perez enkawlna hnuaiah Vallecano an khel ṭha a, tlarhnung an khawng a, an tihtur an hrechiang a, an league match hnuhnung pathuma tlawm vek team hian Real an chelh thei.