Mumbai-in Bengaluru an hneh
India rama club football inelna sang ber Indian Super League pawh khelh chhunzawm zel a ni a, Pathianni zan khan Mumbai City chuan 2-0 in Bengaluru FC an hneh - Vikram Partap Singh chuan goal hnih a khung a, a goal hmasa zawk hi Lallianzuala Chhangte siamsak a ni.
Lunglei tlangval Lianzuala hian goal khungna chance pawh a nei a, mahse, a chhawr thei lo. Mumbai club tan Lianzuala bakah Lalengmawia Ralte (Apuia) leh Hmingthanmawia Ralte ten inkhel bul an ṭan bawk a, Bengaluru tan Lalremtluanga Fanai chu bench aṭangin a lut bawk.
Inrinni zan khan Kolkata club langsar pahnih Mohun Bagan leh East Bengal pawh inlanin, hnehna an chang ve ve. Mohun Bagan-in NorthEast United lakah goal chhuah hmasa zuk mah se, 4-2 in a tawpah an chak.
Highlander tan January thla tawp lama an lakluh Tomi Juric a che ṭha nghal a, Australian striker hian goal hnih a khung - minute rukna lekah penalty hmangin goal hmahruai a khung a, mahse, Bagan hian Liston Colaco leh Jason Cummings hmanga chhangletin, first half hun pek belhah goal hnih an khung - chawlhlawk an hman meuh chuan 2-1 in hma an hruai der!
Juric hian NorthEast tan sut ve leh mah se, Bagan-in Dimitrios Petratos leh Sahal Abdul Samad hmangin an khung leh a, a tawpah Kolkata club hi 4-2 in an chak - Bagan tan hian Lalrinliana Hnamte chu bench aṭangin a lut.
East Bengal-in khualmualah 1-0 in Hyderabad FC an hneh bawk a, Cleiton Silva chuan inkhela goal awmchhun a khung - HFC tan captain leh foreign player awmchhun ni bawk João Victor chu hun tawp dawnah yellow card pahnihna a hmuh avangin hnawhchhuah a ni.
Hyderabad tan Mark Zothanpuia, Lalchhanhima Sailo leh Ramhlunchhunga ten inkhel bul an ṭan a, Aron Vanlalrinchhana, Amosa Lalnundanga leh Jeremy Lalhminghlua te chu bench aṭangin an lut bawk. East Bengal tan defender rinrawl Lalchungnunga chuan Mumbai City nen an inkhelh ṭuma a yellow card palina a hmuh avangin a inlan thei lo bawk.
Punjab laka an mualpho hnuah Kerala Blasters an la insiamṭha thei lo a, khualmualah Chennaiyin chu 1-0 in an ngam lo - Chennai club tan Aakash Sangwan chuan inkhela goal awmchhun a khung a, hun tawp hnaih lamah defender Ankit Mukherjee hnawhchhuah ni mah se, Chennaiyin hian buaina tawk zui loin hnehna an chang a ni.