Milan tlawm zanah Roma an chak

Serie A aṭanga Champions League khelh tum AC Milan chu Pathianni zan khan Monza lakah an tlawm. Stefano Pioli naute an chak loh lai hian tun hnaia harh tharna chang AS Roma erawhin Frosinone chu 3-0 in an sawp thung.

Mualneitu Monza hian Matteo Pessina leh Dany Mota te hmangin chawlhlawk hmain hma an hruai, second half-ah Milan tan striker Olivier Giroud leh Christian Pulisic ten sut ve ve mah sem hun tawp dawnah Warren Bondo leh Lorenzo Colombo ten Monza tan an khung belh.

Milan manager Stefano Pioli chuan, "Ball kan chuh na lo hle a, kan chan laiin kan hum ṭha tawk lo bawk. Monza erawh kha chuan theihtawp takmeuh an chhuah a, hnehna chan phu khawpin an khel - chutihrualin keini lam khan tihsual kan ngah ve bawk," a ti.

Serie A match 25 an khelh aṭangin Milan hian point 52 an hmu a, pathumna an ni mek. An chungah hian Juventus leh Inter Milan chauh an awm - hmahruaitu Inter an phak lohna erawh point 11 a ni tawh, match khatin Milan an khel tam zawk.

Pathianni zan inkhel dangah Roma an che fuh leh tlat. Daniele De Rossi an neih hnuah Roma hi nasa takin an danglam, tun ṭumah pawh hian Dean Huijsen, Sardar Azmoun leh Leandro Paredes ten goal khat ṭheuh khungin an chak nuamsa hle.

Roma manager De Rossi chuan, "Goal thum faiin kan chak ngei mai, mahse hun chanve hma lam kha chu a harsa takzet a ni. Roma ka enkawl chinah forst half chhunga kan chet buai leh tihsual kan ngah ber ṭum a ni hial ang.

"Roma thar kan din mek a, thil thar kan nei vak tihna erawh a ni lo. Kan neihsa leh keimahni kan rilru a thar a, chu chuan kawng dikah min hruai," tiin a sawi. Italian manager hian player lak thar nei rih lo mah se a neihsa a hmang thiam hle.