Brighton-in goal nga an khung

Pathianni zan Premier League-ah Brighton & Hove Albion chuan goal nga ngawt an khung a, khualmualah table mawngphah luahtu Sheffield United chu 5-0 ngawtin an sawp.

Sheffield hian minute 15-na lekah Mason Holgate chu red card vangin an chân a, kum 27 mi English defender hi Kaoru Mitoma laka a chet dan avangin a tirah yellow card chauh pek ni mah se, video assistant referee rawn a nih hnuah hnawhchhuah a ni.

Mahni muala inkhel mah ni se, player kim loa khel Sheffield tan a harsa tawh a, minute nga hnu lawkah Brighton tan Facundo Buonanotte chuan hmahruaina goal a khung zui - season thara European football khelh tum Brighton hi an hawikir tawh lo.

Minute li hnu lawkah Brighton-in an khung belh. Mitoma chance neih chu Sheffield keeper Wes Foderingham-a'n dang mah se, a per lehlam chu Danny Welbeck-a'n goal-ah a chantir a, chawlhlawk hman a nih hmain chak tur a chiang tawh.

Brighton-in goal khungpui an mamawh loh tehlul nen, Mitoma cross chu Jack Robinson chuan an lamah a tilut a, Ivory Coast tana AFCON nomawi chawi hlim Simon Adingra chuan goal hnih a khung ve leh bawk.

Sheffield-in table mawngphah an luah zel a, Brighton chu pasarihnaah chhoin, an chung chiaha awm Manchester United aia an hniamna chu point sarih chauh a ni.