Arsenal inlan hun a thleng leh ta

Arsene Wenger hunlai khan Arsenal hian Champions League an khel ṭhin a, an hnu lamah erawh European football inelna sang ber hi a kheltu ni loin a entu an ni rei hle - Mikel Arteta kaihhruaina hnuaiah an khel leh ta, tunah chuan last 16 an khel dawn.

Zanin dar 1:30 hian Gunners chuan Porto an lenchilh dawn. Tunlai boruak nei ṭha leh thawm na tak North London club hian Liga Portugal lama pathumna ni mek lakah chak an tum ngam dawn a, inhnehtawk ringawt an duhtawk lo ang.

Arsenal hian Champions League knockout stage chinah Porto hi vawi thum an mikhual tawh a, an chak vek bakah goal 11 khungin an lamah a lut lo, khualmualah erawh vawi hnih tlawmin ṭum khat an inhnehtawk thung - zanina an inkhelhna tur hi Estadio do Dragao a ni.

Kalphung thar

Arsenal hian Gabriel Jesus leh Eddie Nketiah an nei a, mahse tun hnaiah hliam leh thil dang vangin an striker pahnih hi an chhawr ngai meuh lo, mak tak mai chu - striker tel loin goal khung an harsat lo, an harsat lo mai ni loin an awlsam zawk emawni tih mai tur a ni.

An match hnuhnung pahnihah Gunners hian goal 11 an khung a, anmahni lamah a lut ve miah lo. Arteta tan pawh an khelh dan phung hi thlak ngawt a uiawm viauin a rinawm a, chutihrualin a player zingah khawih chet thiang lo khawpa nghet an awm bik rih lo.

A bik tlakin tlarhma lam an che nasa - a sir lamah Bukayo Saka chu hmun nghet chang thei a ni a, sir lehlamah Gabriel Martinelli a awm ṭhin thung - player pahnih hi an khelh dan phung inang lo viau mah se team tan an ṭangkai ṭhin.

Leandro Trossard emaw Kai Havertz emaw tlarhma laiah an awm leh a rinawm, anni pahnih hi goal khung tam ni lo mah se midang tan an ṭangkai ṭhin a, ball an chan loh lai pawhin hmun awl siam chhuak zung zung thei an nihna hi midang tan a ṭangkai.

Declan Rice leh Martin Odegaard te chevel hi Porto tan buaipui tham a tling dawn, anni pahnih hi tunlai midfielder hmuhnawm berte zinga mi an ni a, an khelh dan hian Arsenal dinhmun thui takin a hril leh ngei ang.

Porto inring r'u

Sergio Conceicao enkawl Porto hian season ṭha tak an hmang lem lo - Liga Portugal lamah pawh Sportling Lisbon leh Benfica te an phak lo. Season ṭha tak ni lo mah se kartawp an match hnuhnung berah Estrela Amadora chu 2-0 in an hneh.

Goal hnih khung bakah mahni goal venhim hi Arsenal hmachawn tura inbuatsaihna ṭha tak a ni ngei ang. Conceicao-a naute hian league match 22 aṭangin goal 37 an khung tawh a, an elpui dangte nena khaikhin chuan an khung tlem - Arsenal lakah goal khung an harsat mai thei.

Portuguese manager Conceicao hi Barcelona manager Xavi thlaktu tur anga thawm nei reng a ni a, khelh dan phung nghet leh fel tak nei thei a nih avangin Premier League club mikhual tura inbuatsaih dan pawh a thiamin a rinawm.

Porto hian an player neih ṭhat ho an hmang ngam vekin a rinawm a, chutihrualin Arsenal hian rilru kamtu dang an nei. Inrinni zanah Newcastle United nen Premier League an khel zui leh nghal dawn, hahchawlhna hun a tlem avangin an insiksawi deuh hret a nih pawhin a mak lo ang.

Champions League a nih tawh chuan eng team mah hmachhawn chakawm leh awlsam an awm tawh ngai lo, a bikin last 16 thleng thei chin chu zuam sual theih vek an ni. Arteta leh a naute tan pawh a tir aṭanga fimkhur a ngai dawn hle tihna a ni.