Messi awmna MLS an ṭan dawn

Major League Soccer (MLS) chu February 22, Ningani zing aṭangin an khel ṭan dawn. MLS hi season dang nen an inang thei lo, a chhan chu Lionel Messi awmna a nih tawh miau avangin khawvelin a ngaihven.

Season laklawh laiin Messi-a'n Inter Miami a zawm, kumin hi season bul aṭanga hun a hmanna hmasa a ni dawn. Ningani zing dar 6:30 hian Inter Miami hian Real Salt Lake an mikhual ang.

Inter Miami hian Messi chauh ni loin Barcelona tana a khelh pui tawh Luis Suarez, Sergio Busquets leh Jordi Alba te an nei tawh, anni pali hi an vanglai pel deuh tawh mah se an thiam an la theihnghilh lo, an inkawp rem leh ngeiin a rinawm - MLS ti hmuhnawmtu an ni ngei ang.

Suarez chuan, "Theih ni se la chuan nomawi chawi theih zawng zawng chawi kan duh, chu chu season thara kan thil tum pawh a ni ang," tiin a sawi a, season hmasa lama Leagues Cup an lak aia tam lak ngei an duh.