Team talbuai pahnih intawnni a her chhuak - Napoli vs Barca

Zanin dar 1:30-ah Champions League round of 16 match hnih khelh tur a awm dawn a, Arsenal-in FC Porto lenchilhin, Napoli chuan Barcelona an mikhual dawn bawk - zanin chu men rei leh a ngai dawn!

Mizo zinga fans ngah Arsenal-in ngaihven an hlawh ang a, chutihrual chuan Napoli-in Barcelona an lo mikhual tur hian thawnthu ngaihnawmna a keng tel dawn - en loh phal chi a ni kher lo ang.

A chhan maw? Team pahnih hi season hmasa lawka mahni ram league-a champion ve ve an ni a, tun season-a an thawnthu erawh a ropui lo dun takzet. Team pahnih an talbuai a, an hmingchhiatna thup theitu chu Champions League a ni.

Hei vang hian team pahnihin thih thain an bei dawn tih a chiang a, chak lo zawk nih an duh lohna hi ṭum dang zawng aiin a sang lehzual dawn. Rizai inchhawp la, nuam taka intuam lum chungin Naples khawpui lam hawi rawh le!

Napoli buaina

Season hmasa lawk khan Napoli-in kum 1990 hnua a vawi khat nan Serie A nomawi an chawi a, mahse, coach Luciano Spalletti chuan a chhuahsan zui - Italian club hian Ligue 1-a Lille lo champion pui tawhtu coach Rudi Garcia an la lut zui a, beiseina sang tak an nei.

Mahse, November 14 khan French manager hi a hna aṭangin an ban a, an coach hlui leh Italian football-a tawnhriat nei ṭha tak Walter Mazzarri chu an coach thar ni turin an la lut zui a, mahse a ni pawh hi an ban leh tawh!

Mazzarri hnuaiah hian inelna hrang hrangah match 16 khel tawhin vawi nga chiah a la chakpui a, an beisei chu hmu lo tak an ni. Inter Milan coach pawh lo ni tawh hmun ruak luah tur hi tih fel la ni chiah lo mah se Francesco Calzona an lak a rinawm.

Napoli hi tun season-ah Supercoppa Italiana final-ah an chak lo a, Coppa Italia round of 16 aṭangin an tla a, Serie A table-ah pakuana an ni mek bawk. Hmahruaitu Inter Milan chu point 27 zetin an thlau mek a, hmahruaitu an hnaihna aiin relegation zone (16 points) an hnaihna a tlem zawk!

A har a ni

Napoli hian season ṭan dawnah coach chauh an chân lo a, champion dawna tha thawhhlawk leh defender ṭha mi Kim Min-jae chu Bayern Munich lakah an chân a, Hirving Lozano chuan PSV Eindhoven chu euro maktaduai 15-in a zawm bawk.

Italian club hian European club tam tak chil tiputtu Victor Osimhen leh Khvicha Kvaratskhelia an chelh thei a, Napoli fans tam tak an lawm em em rualin player pahnih hian season hmasa an phak lo - hei hi an chet chhiat chhan langsar a ni.

Kum 25 mi Osimhen hian season hmasa khan inelna hrang hrangah match 39 khelin goal 31 a khung a, assist vawi nga a nei. Tun season-ah erawh match 18 aṭangin goal riat chiah a la khung a, assist vawi thum a nei bawk - Barca an hneh dawn chuan Nigerian striker hian harhtharna chan a mamawh.

Georgia international Kvaratskhelia hi khel chhia tia sawi hluai tur ni lo mah se, season hmasa nen khaikhin loh a harsa. Season hmasa khan match 43-ah goal 14 khungin, assist vawi 17 a nei a, tun season-ah erawh match 31 aṭanga goal ruk chiah khungin assist vawi nga a nei - Barca hi a theihna a pholan leh hun a ni.

Ropui lo Barca

Napoli lakah Barca an inchhuang thei bik lo - season hmasaa Xavi hoa nomawi an chawi kha chuan tam takin, "Barca tak tak an lo let leh ta," an ti a, anmahni chhul chhuak coach hnuaia academy player-te vul chho mek chu hmuhnawm ti takin an en a, ngaihnawm ti takin an sawi bang lo.

Mahse, vai film ang chauh a ni a, a changtupa hlim chhung a rei lo. Barcelona hian tun season-ah beisei an phak lo a, nomawi an beisei theihna awmchhun ang hiala chhal theih chu Champions League chauh hi a ni a, a awlsam lo ang tih a chiang.

Spanish Super Cup final-a Real Madrid-in 4-1 an sawp ṭum khan fans tam tak rilru a na a, coach Xavi-a'n fan-te thinlung na hnemin, "Nomawi beisei theihna pathum kan la nei alawm," a ti a, mahse, a sawi lai chu a hnaih lai ber a ni!

Copa del Rey quarterfinal aṭangin an tla a, kha thu a sawi hnua league match ruk an khelhah vawi li chiah an chak a, vawi khat tlawmin, vawi khat draw an nei a, hmahruaitu Real Madrid chu point riat ngawtin an thlau a, an chungah Girona an la awm tel cheu bawk.

Mangṭha mai le

Barca boss Xavi-a'n season tawp hmain Barcelona a chhuahsan tur thu a puang thut a, mi tam takin mak an ti. Spanish coach hian, "Boruak sang tak hi ka zo tawh rih lo a ni," tiin chhuanlam siam mah se, club thuneitute aṭanga a beisei thlawpna a hmuh ṭhat loh vanga bang niin an sawi.

Club president Joan Laporta hi a tir aṭanga Xavi duh lotu nia sawi a ni a, mahse, an club dinhmun a chhiat avangin Laporta-a'n a duh ang coach a la thei lo a, 100% a lung si lo chungin Xavi hi a ruat nia sawi a ni.

Hei chauh a ni lo - nipui lai khan club director pahnih, Xavi nena inhnaih tak Mateo Alemany leh Jordi Cruyff te chu chhuahtir an ni a, Deco a lo lut. Barca midfielder hlui Deco hi Xavi ngaina lotu ve tho a ni a, tun hnaiah result a ṭha lo bawk nen Xavi-a'n a chhuah tur thu a sawi zui.

Mahse, thuthar ber i hre duh em? Barcelona hian Napoli ngam loa Champions League an mangṭha a nih chuan a hun hmain Xavi hi an ban dawn niin an sawi - Xavi-a'n Barca chhuahsan duh mah se, 'ban' nih kher chu a duh dawn bik lo.

A tawp nan

Barca hian an league match hnuhnung berah Celta Vigo chu 2-1 in an hneh hram a, hun pek belha penalty an hmuh vangin an vannei tih loh rual a ni lo - vanneihnain an lam a ṭang reng dawn lo tih hria a, thih tha nena an beih a ṭul tawh.

Xavi-a'n Napoli lakah midfielder pali hman a tum dawn niin Diario AS chuan an ziak a, defender Andreas Christensen chuan defensive midfield hna thawkin, Frenkie de Jong, Ilkay Gundogan leh Pedri te a hmaah an ding dawn nia sawi a ni.

Tlarhmaah rawlthar duhawm Lamine Yamal chu Robert Lewandowski kawppui tura lut tura beisei a ni a, bench aṭanga lut turin Vitor Roque a awm bawk - tlarhnung laiah Ronald Araujo leh Inigo Martinez te an inkawp ang a, mual sir aṭanga pui turin Joao Cancelo leh Jules Kounde an awm ang.

Barca hian bench aṭanga thil thlak danglam thei turin Raphinha leh Fermin Lopez an la nei cheu dawn a, Naples khawpuia chak tum ngam tur an ni - zaninah an lenglut dawn e.