Vawiin aṭangin Santosh Trophy khelh ṭan a ni dawn
FIFA Santosh Trophy vawi 77-na final round chu vawiin aṭangin Golden Jubilee Outdoor Stadium, Yupia-ah khelh ṭan a ni dawn. Match hmasa berah National Games gold latu Services leh nikum finalist Meghalaya te an inkhel ang a, Kerala leh Assam ten an chhunzawm ang. Group A zan inkhel hmasa berah inelna thlengtu Goa leh Arunachal Pradesh te an inkhel thung dawn.
Final round inkhel zawng zawng hi Golden Jubilee Outdoor Stadium-ah vek khelh a ni dawn a, group A leh group B ten an inkhelh chhawk ang. Mizoram hi group B-ah Karnataka, Maharashtra, Delhi, Manipur leh Railways te nen an awm ho. Group khat aṭangin team pali ve ve quaterfinal lut turin an tling ang.
Vawiin tlai dar 5:00 hian Arunachal Pradesh chief minister Pema Khandu-a'n inelna hi a hawng dawn a, ani hi Arunachal Pradesh Football Association-ah President a ni bawk. Prema Khandu hi AP Legislative Assembly speaker PD Sona-a'n a ṭawiawm bawk ang.
Inbuatsaihna
Arunachal Pradesh hian Santosh Trophy final round hi an vawi khat thlenna a ni a, team 12 enkawl hi hna awlsam a ni lo. February 19, Thawhṭanni khan Papum Pare DC Jiken Bomjen, deparment hotute leh Arunachal Pradesh Football Association (APFA) ten inbuatsaih dan ennawninn meeting an nei a, inelna hmachhawn turin an inpeih tawh.
DC Jiken Bomjen chuan, "Santosh Trophy final round chhinchhiahthlak bikah kan siam tur a ni a, kan hna chan ṭheuh ṭha takin kan thawk tur a ni," tiin a sawi. APFA secretary Kipa Ajay hi All India Football Federation Treasurer a ni bawk a, tun inelna an thlen theih chhanah a pawimawh hle. Kipa Ajay chuan team tam zawk an rawn thlen tawh thu leh an hnam tih dan phunga ṭha taka an lo thlen vek thu a sawi.
Santosh Trophy thlengtute hian security, traffic, parking, sanitation management, medical coverage, water connectivity, uninterrupted power supply, internet connectivity leh road maintenance-ah te theihtawp an chhuah. Mizoram thlenna Tsangpo Hotel-ah pawh tui leh internet a ṭha a, Itanagar khawpui kawng a zauh ṭhat avangin traffic jam a awm meuh lo. Chutihrualin faina kawngah erawh hmasawn an ngai ve hle.
Golden Jubilee Stadium-ah tui litre nuai khat dahna tur peih fel a ni tawh a, kartluanin darkar 24 chhung water tanker-in a vil dawn bawk. Stadium fai taka enkawl a nih theih nan bawhhlawh bawm 26 dah a ni a, bawlhhlawh phur motor leh hnathawk paliin inelna neih chhung an vil dawn.
Final round chu
Services hian group stage-ah Mizoram 2-1 in an hneh a, hemi zawh hian National Games-ah an champion. Mizoramin Santosh Trophy nomawi a chawi kuma defender pawimawh Zothanpuia (Thangpuia) chu player pawimawh a ni a, group stage an khelh ṭhat baka National Games-a gold an lak avangin tun ṭumah pawh hian champion rinkai an ni ang.
Services khingpui tur Meghalaya erawhin nikum finalist an nih avanga group stage an khelh ve loh avangin hriatthiam an har hle. Coach Khlain Pyrkhat Syiemlieh-a'n a kaihruai dawn a, player tawnhriat nei ṭha defender Brolington Warlarpih leh forward Chesterpaul Lyngdoh ten an la ho dawn avangin dah hniam erawh an rem lo.
Tlai dar 2:30-ah Kerala leh Assam te an inkhel dawn. Group stage aṭangin Kerala hian player pathum an thlak a, chief coach Satheevan Balan hi kum 2018-a Santosh Trophy nomawi chawipuitu kha a ni bawk. Assam hi group stage-ah an che ṭha a, tun ṭumah pawh hian group stage-a goal sarih khungtu Dipu Mirdha an la hruai tel thei a ni.
Zan dar 7:30-ah Goa leh Arunachal Pradesh te an inkhel dawn. Goa hian group stage-ah Kerala an hneh thei a, coach Charles Dias hoin inelna hi an hmachhawn dawn. Arunachal Pradesh erawh a thlengtu nih vanga final round khel tura tling an ni a, kum dangah sulhnu nei ṭha lo mah se mahni mualah result ṭha neih an tum ang.