BCA leh Vikings an chak

Mizoram Super League (MSL) khelh laiah Zarkawt BCA an chak tluang zel a, kawng erawh a awlsam vek ta bik lo. BCA bakah hian Chanmari Vikings chuan Thawhṭan zan khan an khingpui an hneh ve bawk.

R. Dengṭhuama Indoor Stadium, Mualpuia inkhelah Zarkawt BCA hian a hniam zawka an ṭan reng hnuah Mission Veng Hotshots chu 98-81 in an lehthal hram a, an chak tluang lai record ṭha chu an humhim hram.

A tawpa team pahnih inthlauhna hi point 17 lai ni mah se, a tir lam quarter pahnihah chuan Mission Veng Hotshots hi an sang zawk ve ve. Chawlhlawk an hman laiin Hotshots hian point 17 thoin hma an hruai fal.

Amaherawhchu, second half an hman chinah team ṭha danglamna a lang. Lalnunpuia Renthlei (27 points), Lalrina Renthlei (21) leh Emmanuel Malou (29) ten an theihna lantirin, chiang takin an tho chhuak leh ta zawk a ni.

Inkhel dangah Chanmari Vikings chuan semifinal hmun an chuhpui tur zinga mi Bungkawn LB Associates chu 84-82 in an hneh, team pahnih an inthlau lo takzet - an inkarah hian point hnih chiah a awm!

Quarter hmasa pathumah team pahnih an inbeitawk a, chak zawk tur pawh hriatthiam a harsa. Quarter hnuhnung ber an khelh dawnin Bungkawn LB an sang hret, mahse a hmawr bawknaah Vikings hi 26-21 a sangin an chak tlang ta zawk a ni.

Zanin hian a hmun ngaiah inkhel pahnih a awm leh dawn. Zarkawt BCA chuan Aizawl pawn aṭanga inlan awmchhun Champhai an hmachhawn dawn. Chanmari Vikings hian champion lai Khatla TBL an hmachhawn ve leh thung ang.