United-in Dan Ashworth an hnaih

Newcastle United chuan an club sporting director Dan Ashworth chu Manchester United zawm a duh thu a sawi hnuah chawlh an pe rih a, Red Devils sawmna pawmin Old Trafford a pan ngei dawn niin a lang.

Hetihrual hian United hian Ashworth la lut tur chuan sum an sen a ngai dawn niin a lang a, kum 52 mi Ashworth hian kum 2025 thleng Magpies-ah hian contract neiin, club dang a zawm dawn a nih chuan leichhuah a ngaih tur thu a inziak tel.

Newcastle hian pound maktaduai 10 an beisei dawn nia sawi a ni a, mahse, he thu buatsaih a nih lai hian club pahnih hian indawrna mumal tak an la nei rih lo thung.

Non-league club lama football pawh lo khel ve tawh ṭhin Ashworth hi football khawvela sporting director ṭha ber pawl a ni a, United-a 25% share neitu thar Ineos lam hian lakluh ngei an duh niin an sawi.

College of West Anglia aṭanga zir chhuak Ashworth hian kum 2000 khan Peterborough United-ah Academy Director dinhmun chelhin, football administration a luhchilh ṭan a, Cambridge United-ah Excellence Director ni zuiin, West Brom-ah youth team Assistant Coach leh Technical Director a lo ni tawh bawk.

September 2012 khan FA director of elite development atan ruat niin, player-te chher hriamna project pakhat 'England DNA' tih ngaihtuah chhuaktu zinga mi a ni a, September 2018 khan England FA hi chhuahsanin, Brighton & Hove Albion chu Technical Director ni turin a zawm.

Premier League club ngel nghet ni tura Brighton hma hun duangtu leh tha thawhhlawk a ni a, kum 2017-a England-in FIFA Under-17 leh FIFA Under-20 World Cup nomawi an chawi nan khan tha a thawhhlawk hle nia sawi a ni bawk.

Kum 2022 khan Newcastle a zawm a, tunah chuan Red Devils zawm thei dinhmunah a ding ta - Ineos head of sport Sir Dave Brailsford nen an inhre ṭha hle nia sawi a ni a, United hi a zawm ngei a rinawm hle.

Hetihlai hian Magpies-a a sulhnu hi a ropui vek bik lo. Premier League club-in Sandro Tonali an lakluh nana tha thawhhlawk zinga mi a ni a, Italian midfielder hi July khan AC Milan aṭangin an la lut.

Tonali hi pound maktaduai 55 man lai niin, English football-a a hun ṭantir lamah a thawhhlawk viau a, mahse, sum inthapna lama a lo inhnamhnawih avangin thla 10 chhung inkhel thei lo tura hrem a ni a, tam tak chuan Magpies hi an player lakluh tur hrechiang tawk loah an chhuah a ni.