Hun ṭha bawhpelh Girona

Beisei phak baka season hmang ṭha Girona chuan Real Madrid nen an in kar tihzim theihna remchang an nei a, mahse Athletic Bilbao lakah 3-2 a an tlawm avangin an hun ṭha an bawhpelh.

Thawhṭan zan La Liga inkhel pakhat awmah Bilbao tan Alejandro Berenguer Remiro-a'n goal hnih a khung a, ani bakah hian Inaki William chuan goal khat dang a thawh ve bawk.

Mikhual Girona tan Viktor Tsyhankov leh Eric Garcia ten khung ve bawk mah se point hlawhchhuah nan a tawk zo lo. An chunga awm Real Madrid an chesual tih hre sa mah se an duh angin point thum an hmu thei lo.

Girona coach Michel Sanchez chuan, "Goal hmaah kan hriam tawk lo a ni, a bik takin first half chhung khan goal kan khung thei lo. Second half-ah erawh kan khel ṭha hret a, goal hnih kan sual chhuak chunga kan chak pui zo lo hi a uiawm.

"Kan duh ang result nei lo mah ila kan tawp mai tur a ni lo a, theihtawpin kan bei chhunzawm zel ang," a ti. Defender pawimawh Eric Garcia chuan an club thil tum ber chu Champions League khelh phak a nih thu a sawi ve bawk.

Girona hian La Liga match 25 aṭangin 56 an hmu a, table chung ber dawtah an awm - hmahruaitu Real Madrid an phak lohna chu point ruk a ni chhunzawm; pathumna Barcelona aiin khelh zat inangah point hnihin an sang zawk.