City neituten Turkey lam an hawi

Manchester City neitu City Football Group (CFG) chuan Turkish Super Lig club Istanbul Basaksehir nen thawhhona thuthlung an ziak a, CFG chuan an thawhhona angin Turkish club chu kawng tinrenga an puih tur thu an sawi.

CFG chuan, "IBFK (Basaksehir) in hmasawn zel an tumna kawngah kan pui dawn a, football khawvela an hmachhawp te, player lakluh, scouting leh coaching thlengin kan pui dawn a ni," an ti a, thawhhona chuan Turkish football-a an hmalakna turah a puih let ve tur thu an sawi bawk.

Basaksehir hi kum 2014 khan din ve chauh niin, a neitu hi Goksel Gumusdag a ni a, Turkish sumdawng hausa chuan, "Club naupang tak ni chungin sulhnu tam tak kan lo hnutchhiah tawh a, tunah Basaksehir leh Turkish football tan bung thar kan kai leh ta a ni," a ti.

CFG hian football khawvelah bu an khuar thuk zel a, tun dinhmunah hian Manchester City bakah Australian club Melbourne City, MLS club New York City FC, Lallianzuala Chhangte khelhna Mumbai City, Uruguay club Montevideo City Torque, French club Troyes, Belgian club Lommel, Italian club Palermo leh Brazilian Bahia-ah te share ngah ber an ni a, tun season La Liga-a beisei phak baka khel ṭha Girona-ah 47% share neiin, Chinese club Shenzhen Peng City leh Japan club lar Yokohama F. Marinos-ah te share an nei bawk.