Champion lai Norrie a chak

Tennis inelna ATP Rio Open champion lai Cameron Norrie chuan nomawi humhim ngei a tum, a match hmasa berah Hugo Dellien chu 6-3, 6-2 a hnehin inelna bul a ṭan fuh hle.

Nimin zing Brazil khawpui Rio-a inkhelah Norrie hian hnehna chang turin darkar khat leh minute 21 chhung hun a hmang a, a khingpui service vawi thum a chhuhsak theih laiin ama service erawh a hum vek thung a ni.

British tlangval Norrie hian a match lehpekah chuan Tomas Barrios Vera a tum dawn, Chilean tlangval nen hian tun hmain an la inkhel ngai lo, an intawn vawi khatna tur a ni ang.

Inelna dang Delray Beach Open-ah pawh champion lai Taylor Fritz a chak. Seeded pakhatna ni bawk Fritz hian amah ang bawka American player Tommy Paul chu 6-2, 6-3 in a hneh ve bawk a ni.