India an tlahniam nasa

FIFA ranking chhuak thar berah India chu 102-na aṭangin 117-naah a tla thla a, hmun 15 laiin Blue Tigers hi an tlahniam tihna a ni a, Indian football team tlakhniamna hi a tam tham hle.

India tlakhniam chhan langsar tak chu Asian Cup 2023 a ni a, Asia khawmualpuia ram leh ram inelna sang berah hian India hi inlanin, match thum an khelhah an chak lo vek a, Australia (0-2), Uzbekistan (0-3) leh Syria (0-1) ngam loin puanthuah an tel.

Blue Tigers hian chak an nei lo a ni satliah lo a, goal khat pawh khung loin an lo haw - hei hi mualphona tawpkhawk a ni. Kum 2018 aṭanga chhutin FIFA ranking-a India a tlakhniam ber ṭum a ni.

Asian Cup champion Qatar chuan hmun 21 ngawta hmasawnin, ranking-ah 37-na an ni a, Jordan pawhin hmun 17-a hmasawnin, 70-na an ni a, Tajikistan chu 99-naah an invawrh chho ve bawk.

Quarterfinal aṭanga Asian Cup mangṭhatu Japan chu hmun khata tawlh hnung hretin 18-na an ni ta a, semifinal-a rin loh taka Jordan hneh lotu South Korea chuan hmun khata hmasawnin, ranking-ah 22-na an ni ve ta thung.

AFCON champion Ivory Coast chuan hmun 10 ngawta hmasawnin, 39-na an ni a, final-ah tlawm mah se, Nigeria pawhin hmun 14-a hmasawnin, 28-na an ni tawh.

Hetihlai hian top 10 chinah chuan inthlak danglam a la awm lo a, Argentina chu ranking sang ber la ni zelin, France, England, Belgium leh Brazil ten an hnung an dawl a ni.