Mizoram inlan hun a thleng ta : Zanin dar 7:00-ah Mizoram vs Maharashtra
77th National Football Championship for Santosh Trophy 2023-24 final round-ah zanin dar 7:00 hian Mizoram leh Maharashtra te an inkhel dawn. Inkhelhna hmun tur hi Golden Jubilee Stadium, Yupia a ni a, Mizoram team hian Itanagar Mizo Association hnen aṭangin ṭawiawmna ṭha an dawng ang.
Group B inkhel dangah vawiin chawhma dar 10:00 hian Delhi leh Karnataka te an inkhel ang a, chawhnu dar 2:30-ah Manipur leh Railways te an inkhel ang. Group khat aṭangin team paliin quarterfinal an lut dawn. Inkhel hi Arunachal Pradesh Football Association YouTube Channel-ah a en theih ang.
Stadium thar chu
Final round khelhna tur Golden Jubilee Stadium hi February 19, 2022 khan Arunachal Pradesh chief minister Pema Khandu-a'n a hawng. Project an sanction hi March 28, 2014 daih tawh kha niin khatih hunlaia chief minister Nabam Tuki-a'n November 26, 2014 khan lungphum a phum.
Stadium project hi April 27, 2018-a peih tur ni mah se chhan hrang hrang vangin peih a ni lo. Stadium sakna tura sum dah hi nuai 5948.80 a ni a, ennawn hnuah nuai 7084.70 a ni. Entu 17,000 leng thei tura duan a ni a, stadium hian belhchian a dawl hle.
Stadium chhungah hian entrance lounge, team change room, VIP lounge, conference room, administrative office, cafeteria leh choka, press media room, doctors room, counseling room, players lounge, player-te chaw eina tur leh player 128 awm theihna dormitory a awm a, toilet bakah gym te a awm tel bawk.
Stadium hnuaiah hian tui litre nuai khat leng tanky a awm a, la inpeih kim lo mah se stadium chhung a fai ṭha hle. Football field bakah track awm tur a ni a, tlanna hi peih a la ni lo thung. Ground-ah hian artificial turf (FIFA elite quality) hman a ni a, Santosh Trophy final round thleng turin Arunachal Pradesh Football Association leh state sorkar inbuatsaihna a ṭha hle.
Stadium a hla
Mizoram hi Tsangpo Hotel, Itanagar-ah an thleng a, inkhelhna tur hmun Golden Jubilee Stadium hi 15 km vela hlaah a awm daih. Itanagar-ah kawng a zauh ṭhat avang leh lirthei a tam hran loh avangin motor jam a awm lo thung a, darkar chanve bawr velah chuan thlen theih beisei a ni.
Mizoram manager K. Lalenghluna (Maenga) chuan, "Stadium an nei ṭha a, Mizorama neih ve atan a awhawm ve khawp mai. Chutihrualin kan thlenna hotel aṭangin a hla hret a, player zingah motor rui ṭhinte an awm avangin a buaithlak dawn. Han tih theih vak a awm lo a, ngai kan awh vat theih nan hotel aṭanga kan chhuah hma a ṭul ang," tiin Vanglaini a hrilh.
Mizoram an inpeih
Itanagar boruak awm dan an hriatthiam theih nan Mizoram an thleng hma hret a; February 19, Thawhṭanni zing khan an thleng a, tlai lamah park-ah thlan an ti tla. February 20-21, 2024 chawhnu khan training an nei ve ve a, match hmasa ber khelh hmain ṭum hnih training an nei hman.
Mizoram coach Lalsangzuala Hmar chuan, "Training hmasa ber ṭantirh khan player-te kha an che vel a sak a, a tawp lamah erawh an hmuhnawm leh tawh khawp mai. Training ground chauh ni loin hotel-a ka naute khawsak danah ka lawm a, an nungchang hian phurna nasa tak min pe a ni," tiin Vanglaini a hrilh.
Maharashtra laka Mizoram khelh dan tur hriatthiam a la har viau a, striker Lalnunzama chu ke hliam vangin a khel thei dawn lo. Mizoram squad-ah hian player 22 an awm a, position tinah player pahnih zel an awm. Coach Sanga chuan, "Tute pawh khel tlak tura an inpeih hi a ngai a, hun rei lote chhungin match nga kan khelh ngei a ngai dawn a, player tin hi a pawimawh vek ang," tiin a sawi.
Mizoram-ah hian group stage-a player an thlak nual a, tlarhma lam player an thlak vek. Engtin nge tlarhma an rem ang, tih hi a hriat chakawm lai chu a ni. Mual sira chhawr theih turin Vanlalbiaa Chhangte, Vincent Lalduhawma, Sawma Tlangte leh Lalthankima te an awm a, a khel tur hriat loh mah se heng zinga pahnih hian bul an ṭan dawn tih a hriat theih.
Maharashtra lam hi
Mizoram khingpui tur Maharashtra hian group stage-ah an khingpui an hneh vek a; final round-ah an player pawimawh captain Nikhuil Kadam, Himanshu Patil leh Advaite an hruai leh thei ve bawk. Chutihrualin Maharashtra hian squad an siksawi hret a, tel thar zingah Raju Gaikwad a tel.
Gaikwad hi Jeje Lalpekhlua leh Lalrindika Ralte te nena India team-a awmho ṭhin kha a ni a, India tan baka ISL leh I League-a a tawnhriat hi team tan ṭhatpui tham a tling ang. Maharashtra hi final round-a tel ve reng an nih avangin team ṭha an ni.
Senior team-a Mizoram nena an inkhelh hnuhnun ber chu kum 2017-ah a ngaih theih a, final round match hmasa berah coach Sanga kaihhruai Mizoramin Maharashtra hi 3-1 in an hneh. Mahse, kum 2016 khan final round-ah tho Mizoram hian Maharashtra hi 1-0 in an hneh lo.
H. Vanlalthlanga hoa Mizoram an champion ṭum khan Maharashtra hi final round-ah 2-0 in an hneh a, chutihrualin team pahnih hian semifinal an lut ve ve. Maharashtra hian Santosh Trophy-ah sulhnu an nei ṭha a, Mizoram tan point thum hlawhchhuah a awlsam lo ang.