Man City chakpuitu Haaland

Erling Haaland hi chu a danglam a, goal nen hian sawi hran rei theih a ni lo - a khung leh nge nge ṭhin. Manchester City striker Haaland hian Brentford lakah goal khat khungin, a team hi 1-0 in hnehna a chanpui.

Pep Guardiola enkawl Man City hian Premier League match 25 aṭanga point 56 hmuin table-ah pahnihna an ni a, hmahruaitu Liverpool an phak lohna chu point khat niin, an hnuaia awm Arsenal aia an sanna pawh point khat tho a ni.

Man City hi Reds hmachhawn turin Anfield-ah an la lut dawn. Etihad Stadium-ah Gunners an la mikhual dawn bawk - EPL champion tum boruak a sang a, match khat chetsual zeuhah an dinhmun a la inthlak kual thei vek.

Halland leh goal

Thawhlehni zan Etihad Stadium-a inkhelah Man City hian an tih ṭhin dan pangngaiin ball an chang tam a, inkhel an thunun hneh hle bawk. Mahse, Brentford lam an inveng thiam tlat, counter attack remchang an zawng ve reng bawk.

Chelsea lama hun ṭha tam tak hlahtu Haaland meuh pawhin a khung thei lo. Minute 71-naah erawh Haaland tak tak kan hmu, anmahni lamah City hian Bees player an pawt khawm, hemi karah hin rang lutukin an vaw let thung.

Julian Alvarez-a'n laklawh nei loin a hmaa awm Haaland tan a pe, Norway international hian amah vengtu Brentford defender Kristoffer Ajer tana chet lak tilaklawh tawk chiahin a dang per - Ajer hi a tlu zui, a tan tih theih a awm tawh lo.

Kum 23 mi Haaland-a'n chak lutukin goal lamah a tlanpui a, keeper Mark Flekken hmaah tihsual nei miah lohin goal kilah a khung. Premier League bika a hmachhawn team zawng zawng lakah goal a khung kim ta vek.

Haaland bawkin an goal hnihna khungah a inngai, hnai tak aṭangin a tauh lut. Mahse, a siamsaktu defender Kyle Walker chu a lo offside avangin a goal hi hnawlsak a ni a, goal dang lut zui loin Guardiola nauten point thum an hmu.

Haaland chhantu Pep

Premier League season kal laiah goal 17 a khung tawh a, inelna hrang hrangah goal 22 a khung tawh bawk - striker tam tak tan chuan season ṭha bik a ni der tawh. Mahse, Haaland tan meuh chuan a goal khung zozai hi sawisel a tawhna tham 'lek' a ni.

Haaland sawiseltute chhangin Guardiola chuan, "Hliam vangin thla hnih chhung a inkhel thei lo a, tun hnai khan a pi a thi bawk. A chunga thil thlengte hi mihring pangngai tan awlsam taka tawrh ngawt theih chi a ni bik lo.

"Goal pawimawh leh khung tura duh bik thlang dawn ta ni ila, tun ṭuma a Erling goal hi ka thlang ngei ang. Ani hi chu sawisel ngawt chi a ni lo, a chhan chu rei lote hnuah a chhanna chu thil tih hmangin a pe mai ang che," a ti.

Tunah chuan Haaland a dam pangngai leh tawh a, goal pawh a khung chho leh dawn ṭan niin a lang. Man City striker hi season hmasa anga a tal leh a nih ngat chuan an nomawi kawl lai pathum an humhim a nih pawhin a mak lo ang.