Real Madrid zawm tur Mbappe

Inremna thu la ziak fel chiah lo mah se Kylian Mbappe chuan Real Madrid a zawm ngei dawn. Spanish football writer rintlak Guillem Balague chuan Mabppe leh Real te hi a inrem tawh niin a sawi.

France captain Mbappe-a'n tun hnai khan Paris Saint Germain tana a contract neih lai pawhsei a tum lo tih a sawi chiang a, tun season tawp rual hian man nei loin a club duhzawng a zawm thei ang.

PSG tana goal 244 khung tawhtu, an club tana goal khung hnem ber ni bawk Mbappe hian hlawhtlinna sang zawk chan a duh. February 13 khan PSG president Nasser Al-Khelaifi a hmu a, a hma hun hi March thla ral hmaa tihfel a duh thu a hrilh.

Kum 25 mi chauh a la nih avangin hmabak thui tak a la nei - Balague sawi dan chuan Mbappe-a'n season nga daih contract a ziak ang, season khatah pound maktaduai 12.8 a hlawh dawn.

Contract a ziah avangin pound maktaduai 128 an pe bawk ang, hei erawh kum nga chhunga pek tur a ni thung - sum um ni se la chuan Saudi Pro League lamah Real lama a hlawh leta tam hlawh theihna a nei, mahse a hnawl a ni.

A hlawh pangngai bakah hian sumdawnna lama hlawhna tur hrang hrang a nei bawk. Contract a ziah hma aṭangin a jersey hak tur an inrinsiak leh nghal tawh, tun season tawpa chhuak tura sawi Luka Modric-a hak jersey number 10 a ha dawn niin an sawi der tawh.

Real manager Carlo Ancelotti pawhin engtiangin nge a player neihte a rem ang tih zawhna a awm. Italian manager hian tlarhma sir lama khel turin Vinicius Jr a nei sa - Brazil international bakah hian Mbappe leh midfielder Jude Bellingham te chu goal nawr nan a hmang dawn niin an sawi.

Real Madrid president hlui Ramon Calderon chuan, "Player naupang rual ṭha tak tak Vinicius, Rodrygo leh Bellingham te kan nei a, anni vang hian La Liga hmahruaitu kan nih bakah Champions League kan khelh hoah hnehna kan la chang vek.

"Anni pathum hi Mbappe chuan a rawn zawm dawn tihna a ni a, kan ṭha lehzual dawn a ni. Real Madrid ṭantute hian Bernabeu Stadium chhunga a inkhel an en châk tawh a, he club tana player pawimawh leh sulhnu nei ṭha a ni thei ngei ang," a ti.

Tun dinhmunah chuan Mbappe hi PSG player a la ni rih. Ligue 1 lamah fal takin hma a hruai pui mek, hei bakah hian Champions League quarterfinal lut turin an dinhmun a ṭha tawh - Paris club tan hnathawh hmabak a la nei lian hle.