Atletico 'puja' a fuh thei lo - Inter hmaah an tlawm

Spanish La Liga-a beisei phak lo Atletico Madrid-in league-a an chet ṭhat loh thupmawi an tumna chu Inter Milan hmaah a thamral a, Thawhlehni zan Champions League round of 16 first leg-ah Inter hi 1-0 in an ngam lo.

San Siro-a inkhelah Marko Arnautovic chuan inkhela goal awmchhun a khung a, goal luh hun hi minute 79-na a nih tawh avangin Atletico tan 'comeback' turin hun a tam tawk tawh lo - khualmualah an tlawm.

Diego Simeone naute tan engkim tawpna erawh a la ni lo a, mahni mualah second leg an la khelh leh dawn avangin quarterfinal beiseina a la thi lo. March 13, Nilaini zan hian Atletico khelmualah an intawng ve leh ang.

Atletico boss Diego Simeone tan coach a nih hnua Champions League-a a team a kaihhruai vawi 100-na chiah a ni a, Argentine coach tana mellung pawimawh tak hi a nauten a beisei result nen an lawmsak thei lo.

Inter an chungnung

San Siro-a inkhelah team pahnihin 3-5-2 formation ve ve an hmang a, goal khung ngawr ngawr piahlamah goal venhim an ngai pawimawh tel tih a chiang. Hamrik rik rualin Inter-in inkhel an thunun a, Atletico lam hian Italian club an chhaih mangang meuh lo.

Inter tan season duhawm tak hmangtu Lautaro Martinez bawk a hmuhnawm a, Argentine striker hi a vanneih zan ni se, goal khung thei a ni. Mahse, a chance neih ṭhat vawi hnih ngawt chu Jan Oblak-a'n ṭha zetin a dansak ve ve.

Marcus Thuram pawhin first half-ah chance nei mah se, holam takin a pet a, goal awm loin chawlhlawk an hmang. Thuram hi a ball petna lamah a inhliam a, second half lut tawh loin Marko Arnautovic chuan a thlak.

Arnautovic hian Federico Dimarco siamsak ṭha zet aṭangin chance duhawm a nei nghal a, mahse, Austrian striker hian hnai set sawt aṭangin a thlawh over a, a uiawm takzet.

A changtupa

Atletico-in chance nei lo tawp an ni bik lo. Brazilian wing back Samuel Lino chuan ṭha zeta ball a tlan luhpui hnuin chance duhawm a nei a, mahse, kum 24 mi hi a vanneih zan a ni lo - goal zawnah a pet thei tlat lo.

Inter tan Arnautovic kan hmuh chhunzawm a, mahse, Stoke City striker hi goal hmaa a vanneih zan a ni lo mai dawn em ni aw, tih tur a ni a, Martinez siamsak chu hnai tak aṭangin a thlawh over!

Mahse, kum 34 mi Arnautovic a vanduai reng bik lo. Martinez-a shot chu Oblak bawkin ṭha zetin dansak mah se, a per lehlam chu Arnautovic-a ke bulah a tla a, West Ham striker hlui hian goal ruakah a khung.

Atletico tan khup hliam damkawr, bench aṭanga luhtir Alvaro Morata chuan a team chhan theihna remchang a nei a, mahse, tun season-a 'form' zet striker hian a hun ṭha neih a bawhpelh. Hun tawp thleng goal dang a lut tawh lo a, Inter an chak.

Buaina & hmabak

Atletico tan hliam vanga a chawlh vang vang hnuah Morata a lo kir a, goal keng tel rih lo mah se Spanish striker dam leh ṭan hi Madrid khaw club tan chanchin lawm a ni. Hetihrual hian chanchin lawmawm lo hriat tur an nei tel thung.

An thiampuipa Antoine Griezmann chu ke rek hliam vangin lakchhuah a ngai a, French forward hliam hi eng ang taka na nge a nih he thu buatsaih lai hian sawi theih a la ni lo.

Atletico manager Diego Simeone chuan, "A ke rek a bilh a, inbilh satliah mai a nih kan beisei," tiin inkhelh zawhah a sawi a, a dinhmun chiang takin a la sawi thei rih bik lo - defender Jose Maria Gimenez chu halftime-ah hliam vangin lakchhuah a ngai bawk.

Spanish club hian Inrinni zanah La Liga match khel turin Almeria an lenchilh zui dawn a, February 29 zanah Athletic Bilbao nen Copa del Rey semifinal second leg an khel bawk ang - first leg-ah 1-0 in an lo tlawm tawh.