PSV leh Dortmund an inhnehtawk

Thawhlehni zan Champions League inkhel dangah PSV Eindhoven leh Borussia Dortmund an intawng a, 1-1 in an inhnehtawk - mikhual Dortmund hian goal khung hmasa zawk mah se, Dutch team hian second half-ah penalty hmangin an chhanglet a ni.

PSV khelmualah mualneitu team-in bul an ṭan ṭha zawk a, mahse, an chance neih an chhawr thei lo - a bik takin Malik Tillman-a'n a hun ṭha neih a chhawr loh chu uiawm a tling a, Dortmund-in an hrem zui.

Kum 2021-a PSV aṭanga Dortmund pantu Malen a inlar a, penalty box pawn hret aṭanga ball tlan luhpuiin, angle chep tak kar aṭangin goal kilah a 'shot' lut. A club hlui laka goal khung a nih avangin a lawm duh lo a, kum 2021 hnua Champions League-a goal a khung leh hmasak ber a ni.

Hei mai a ni lo - Dutch player-in Champions League knockout stage-a Dutch club laka goal a khung hmasak ber record a siam tel bawk. Kum 25 mi Malen hian season a hmang ṭha hle - tun season inelna hrang hrangah match 29 khela goal 11 khungin, assist vawi thum a nei a, Dortmund a pan hnua goal a khung hnem ber a ni.

Netherlands tan vawi 28 inlana goal nga khungtu Mallen hian July 2021 khan Dortmund hi a zawm a, German club a zawm hma season-ah hian PSV tan inelna hrang hrangah match 45 khelin goal 27 a khung a, a lakah beiseina a sang hle.

Mahse, a season hmasa berah goal kua khungin, season hmasa khan match 35-ah goal 10 a khung a, tun season-ah hmasawnna hmuh tur a awm leh ta - Dortmund ṭantute tan chuan a lawmawm khawp ang.

Malen-a goal khung hnuah PSV hian si phurh sut theihna remchang nei mah se, Johan Bakayoko chuan a chance neih ṭhat goal-ah a chantir thei lo a, an hun ṭha neih a khawhral.

Mahse, Dutch team hi an vanduai reng bik lo - Dortmund defender Mats Hummels chu Malik Tillman lakah foul-in, penalty a chawi a, Luuk de Jong chuan 'cool' zetin goal-ah a chantir - kum 33 mi striker hian tun season inelna hrang hrangah match 35 khelin goal 28 ngawt a khung ta.

Barcelona striker hlui hian PSV tan Champions League-a goal kua a khungna chiah a ni a, goal riat khungtu Ruud van Nistelrooy record khumin, PSV tana Champions League-a goal khung hnem ber record a siam.

PSV tan inelna hrang hranga match 31 zet a zawna an tlawm lohna a ni ta. March 13 zanah second leg khel turin Dortmund hi an la lenchilh leh dawn a, German club hian an mual Signal Iduna Park-ah November 2021 aṭang khan Champions League-a tlawm an la nei lo - a la ngaihnawm dawn chauh.