Bayern leh Tuchel an inṭhen dawn

Tun season-a beisei phak lo Bayern Munich chuan thuthar an nei a, coach Thomas Tuchel nen inṭhen mai tur anga sawi thawm awm reng chu tihchian a ni ta - mahse, season tawp atan chauh a ni a, tun season chhung chu a la enkawl ang.

Kum 50 mi Tuchel hian March 2023 khan German champion hi a zawm ve chauh a, June 2025 thleng enkawl turin contract a nei. Mahse, beisei ang result a neihpui lo a, a contract zawh hma season-ah inbiakremnain an inṭhen dawn.

Chelsea boss hlui Tuchel hian Julian Nagelsmann thlakin, German club hi a zawm a, a enkawl tirh hian Bundesliga, Champions League leh German Cup-ah te la champion thei vek an ni a, mahse, league nomawi a chawipui hram - hei pawh Borussia Dortmund chetsual zar an zo, tiin a sawi theih.

Bayern CEO Jan-Christian Dreesen chuan, "Inpawh leh inhawng taka inbiakna neih a nih hnuah, inṭhen mai turin thutlukna kan siam fel ta a ni. Kan tum ber chu season thara inher rem a, coach thar nena season hmachhawn a ni.

"Tun season atan erawh he club ami zawng zawngte Champions League leh Bundesliga lama kan thlen theih sang ber thleng tura theihtawp chhuah turin kan inngen a ni.

"A bik takin team-in mawhphurhna sang tak kan nei a, a bik takin Champions League-a Lazio kan hneh loh hnuah khan, fans puihna nen quarterfinal luh ngei kan inring a ni," a ti!

Bayern hian an match hnuhnung pathumah chak an nei lo. Bundesliga nomawi chawi tura an elpui Bayer Leverkusen chu 3-0 in an ngam lo a, Champions League round of 16 first leg-ah an hneh ngei tura ngaih Lazio chu 1-0 in an ngam lo zui a, Pathianni zan khan league-ah VfL Bochum chu 3-2 in an ngam lo bawk.

Tuchel chuan, "Season tawp rualin kan chhuak dawn. Mahse, kei leh ka coaching staff-te chuan hlawhtlinna sang ber kan chan theih nan theihtawp kan chhuah chhunzawm dawn a ni," a ti a, inthlahdah phah an tum lo.

Kum 2021 Champions League-a Chelsea champion puitu Tuchel hian season hmasa CL-ah khan Bayern hi quarterfinal hruai thlengin, champion zui ta Manchester City an ngam lo a, Bundesliga tawp niah Borussia Dortmund-in 2-2 a Mainz an inhnehtawkpui avangin league nomawi an chawi - Bundesliga-a vawi 11 a zawna an champion-na a ni.

Nipui transfer-ah Tottenham Hotspur aṭangin England captain Harry Kane an la lut a, pound maktaduai 86 man striker hian tun season inelna hrang hrangah match 30 khelin goal 29 khung tawh mah se, Kane tel chung pawhin eng ruai an ang lo.

Bundesliga-ah hmahruaitu Leverkusen chu point riatin an thlau mek a, German Cup-ah second round aṭanga tlain, German Super Cup-ah RB Leipzig chuan 3-0 ngawtin an sawp bawk.