LPS Cup - vawiinah khelh chhunzawm dawn

Mahindra XUV 300 LPS Cup Inter Village Football Tournament 2024 chu vawiinah khelh chhunzawm a ni dawn a, nimin lamah inkhel a awm lo thung - vawiinah hian match ruk ngawt a awm dawn a, 1st Bn. MAP Ground, Armed Veng leh Ramhlun Sports Complex-ah te khelh a ni ang.

1st Bn MAP Ground lamah zing dar 10:00 hian Kanan Veng leh Lungleng I an intawng dawn a, chhun dar 12:00-ah tualchhung football inelnaa thawm nei lian ve reng ṭhin Durtlang leh Maubawk an intawng thung ang.

Tlai dar 2:00-ah team ṭha Lengpui an inlan dawn bawk a, an hmachhawn tur hi Ramhlun Venglai a ni. Ramhlun Sports Complex lamah pawh match thum khelh tur a awm a, tualchhung football-a hming langsar tak tak Zemabawk North, Dinthar leh Chanmari an inlan dawn.

Zing dar 9:00-ah Zemabawk North chuan Dawrpui Vengthar an hmachhawn dawn a, dar 11:00-ah Tanhril leh Dinthar inkhelin, chhun dar 1:00-ah Aibawk leh Mizoram Premier League club nei veng Chanmari an intawng ang.