Hamilton tan a awlsam lo ang - Verstappen

Formula 1 season ṭan hun a hnai zel a, champion lai Max Verstappen pawhin thawm a rawn nei. Dutch tlangval hian a elpui zinga mi Lewis Hamilton tan kumin chu awm dan thiam a harsa viaua a rin thu a sawi.

Hamilton hian tun season bak chu Mercedes car a khalh dawn tawh lo, season tharah Ferrari a zawm dawn tih a chiang tawh. A chhuak dawn tih chiang vek chungin kum khat chhung chu Mercedes nen an la thawkdun dawn, hei tak hi Max-a'n a harsat a ring.

Red Bull driver Verstappen chuan, "Season ṭan hmain chanchinthar lian tak mai kan hria, keimah chauh ni loin midang pawhin mak an tih ngei pawh ka ring a, amah Lewis tan tak hian awmdan thiam a harsa khawpin ka ring.

"Hun rei tak chhung inelna hautak kan lo hmachhawn dun tawh ṭhin a, kuminah pawh hian a hautak leh khawp ang. Chutihrualin, atan hian hmun khata rilru pek a harsain ka ring hle," tiin a sawi.

Season hmasa khan Verstappen hian intlansiak 22 zinga 19 tehmeuhah hnehna a chang a, car intlansiakna sang berah hian season khat chhunga chak hnem ber record a siam, kuminah pawh a vawi li nan champion ngei a tum ang.

World champion vawi sarih ni tawh Hamilton pawh kum 39 mi ni tawh mah se a la beidawng lo, champion hnem ber a nihpui Michael Schumacher kalsan a duh a, hei vang hian Mercedes aiin Ferrari a thlang zawk a, chumi tur atan chuan kumin hi inbuatsaihna ang a ni dawn.

Formula 1 season thar hi March thlatirah an tlan ṭan dawn, a hmasa ber atan Bahrain International Circuit, Sakhir-ah Bahrain Grand Prix an tlang ang - kumin hian intlansiak 24 awm tura ruahman a ni.