Jota a chawl rei dawn

Liverpool manager Jurgen Klopp chuan forward Diogo Jota chu a khup hliam vangin thla engemaw zat a chawlh tur thu a sawi a, Portuguese media ho chuan an ram player chhuanvawr hi thla hnih a chawlh tur thu an sawi.

Kum 27 mi Jota hi Brentford nen an inkhelh ṭumin a inhliam a, Klopp chuan, "Diogo hian dam turin thla khat aia tam a mamawh dawn," a ti a, February 25, Pathianni zana Chelsea nena League Cup final an khelh turah a inlan thei dawn lo.

Jota chuan, "Chanchin lawmawm lo tak a ni a, ka lo let leh thuai theih nan theihtawp ka chhuah ang," a ti - Brentford nen an inkhelh hma lawk khan January Premier League Player of the Month atan thlan a ni a, a inhliam zui.

Portuguese forward hian tun season inelna hrang hrangah match 28 khelin goal 14 a khung tawh a, Liverpool tan player pawimawh a ni a, a bik takin Mohamed Salah awm loh laia zo taka mawhphurhna latu a ni.

Brentford nena an inkhelah khan Jota chauh ni loin Reds midfielder Curtis Jones chu hliam vanga lakchhuah a ngai bawk a, striker Darwin Nunez pawh hliam na lo mah se inven nan tiin an la chhuak.

Jones hian a ruh chuktuahah hliam a nei a, Brentford laka inlan lo keeper Alisson chuan a tihrawlah hliam a nei bawk. Klopp chuan player pahnih hi an dam hun tur a sawi theih loh thu a sawi.

Reds hian defender chhuanvawr Trent Alexander-Arnold chu khup hliam vangin an chhawr thei lo mek bawk a, midfielder Dominik Szoboszlai chu malpui hliam vanga chawl mekin, Thiago Alcantara chuan a tihrawlah hliam a nei bawk.

Klopp chuan, "Buaina kan nei lo, tih ka duh a, mahse, a ni si lo. Alisson hi engtia rei nge a chawlh dawn ka sawi thei lo a, Trent leh Dom ten dam lam pan mah se, training an la zawm thei lo," a ti a, Reds damdawi in a lun rih hle.

Liverpool hian nizan khan Luton Town nen league match an khel a, he thu buatsaih a nih lai hian result kan hre hman lo.