Services leh Kerala an chak

FIFA Santosh Trophy 2014 chu nimin aṭangin khelh ṭan a ni a, inkhel a nung nghal hle. Services leh Kerala te an chak a, an hneh hi NorthEast state pahnih Meghalaya leh Assam te an ni. Nizan khan inelna thlengtu Arunachal Pradesh leh Goa te an inkhel a, result kan hre hman lo.

Golden Jubilee Stadium, Yupia-a inkhel hmasa berah National Games champion Services-in nikum finalist Meghalaya 1-0 in an hneh a, goal awmchhun hi injury time-a Shafeel Pp-a'n penalty hmanga a thun a ni. Inkhelhna hmun hi artificial turf a ni a, Meghalaya-in Services an ngam a, goal chance pawh an ngah zawk.

Mahse, injury time-ah pawh minute nganaah Services midfielder Lethaolen Khongsai volley chu Meghalaya player-in ban phar chungin dan a tum a, a kut a per si avangin penalty a chawi. Zothanpuia telna Services an vanneih phah.

Assam leh Kerala inkhel a hmuhnawm lehzual a, Kerala hi 3-1 in chak mah se an vannei a tih theih. Kerala-in Abdu Raheem (19') leh Sajeesh (67') te hmangin an khung hmasa a, Assam an tlawm duh lo. Group stage-a an goal khung khawl Dipu Mirdha hmangin minute 77-naah siphurh an sut ṭhen a, na takin an nawr zui. Assam-in hun ṭh an bawhpelh a, Kerala captain Nijo Gilbert-a'n injury time-ah chak nemnghehna goal a khung.