Ratcliffe-a'n United-ah share nei ta

Sir Jim Ratcliffe chuan Manchester United-ah 27.7% stake a nei ta a, British sumdawng hausa tawntaw hian pound tluklehdingawn 1.25 a inseng.

Kum 2005 aṭanga Manchester United neitu ni tawh Glazer chhungkua chuan share tam zawk an la chang dawn a, mahse, Ratcliffe-a company Ineos group chuan football operation bik an chang tawh dawn a ni.

Ratcliffe chuan, "Manchester United neitu zinga ka tel thei ta hi ka tan chuan chawimawina ropui tak a ni a, mawhphurhna sang tak a keng tel nghal tih pawh ka hria.

"Tunah chuan engkim a fel ta a, mahse, hei hi English, European leh khawvel thlenga top team ni leh tura United kan kaihhruaina tura a bul ṭanna chauh a ni. Vawiin aṭangin rim takin kan thawk ṭan nghal ang," a ti.

Manchester-a piang Ratcliffe hi petrochemicals company Ineos-ah Chariman niin, United ṭantu a ni a, May 2022 khan Chelsea lei a tumnaah a lo hlawhchham tawh.

Ratcliffe hian December 24 khan Glazer chhungkua hi inremna lo neihpui tawhin, an inremna ang chuan Old Trafford stadium chei ṭhat nan £237mtd sen a tel a, a tirah £158mtd pe nghalin, hei hian 27.7% ah share a tisang a, £79mtd chu kum tawp lamah an pe leh ang.

Mipa leh hmeichhe football team enkawl chu an kutah a awm ang a, academy pawh an kut tur a ni. Manchester United plc leh Manchester United Football Club board-ah an aiawh pahnih ve ve an thawh thei bawk ang.