Second round-ah Sabalenka chak lo

Australian Open hmeichhe champion Aryna Sabalenka chuan Melbourne Park lama hlawhtlinna a chan hnuah inelna a hmachhawn leh a, beisei phak loin a match hmasa berah a chak lo nghal.

Thawhlehni zan Dubai Championships second round inkhelah Sabalenka hi Donna Vekic lakah 6-7 (5-7), 6-3, 6-0 in a hneh lo, inkhelah hian game hnuhnung 13 zinga 12 tehmeuh chu Croatian nula Vekic hian a la.

Belarusian nula Sabalenka chuan, "Ka khelh dan kha mak ka ti, a bik takin a tawp lama ka che fuh lo lutuk kha chu pawm thiam pawh a harsa khawp mai. Service ka hloh nasa lutukte kha inenfiah ka ngai takzet," a ti.

Kum 26 mi Sabalenka hian a service vawi ruk ngawt a hloh. Inelna lian Australian Open a champion theih chhan pakhat kha a service neih ṭhat a chhawr vang a ni a, hun rei lote chhungin a boruak a inthlak chiang hle.

Inkhel dangah Iga Swiatek erawh a chak. Kar hmasa lawka Doha title latu hian Sloane Stephens chu 6-4, 6-4 in a hneh. Tun hnaiah Polish nula Swiatek inkhel a hmuhnawm a, tun ṭumah pawh hian champion tura rinkai a ni.

US Open champion lai Coco Gauff pawh a chak, thla thara kum 20 tling tur Gauff hian Italian player Elisabetta Cocciaretto chu 6-1, 7-5 in a hneh. American tleirawl hian a match lehpekah chuan Karolina Pliskova a tum leh ang.