Alcaraz ke rek a hliam

Carlos Alcaraz chu a ke rek hliam vangin Rio Open aṭangin a inhnukdawk a, a hliam hi endik tur niin eng chena rei nge a chawlh dawn tih sawi lawk theih a la ni rih lo.

Nimin zing khan Rio Open-ah Alcaraz hi a inlan, a match hmasa berah hian tualchhung tlangval Thiago Monteiro nen an inhmachhawn - game khat ve ve chauh an la hman, hliam vangin a khel chhunzawm thei ta lo a ni.

Kum 20 mi Alcaraz chuan, "Eng ang tak nge a nih ka la sawi thei lo, kei pawhin endik hun ka nghah a ngai. Na tak leh chawlh rei ngai tur ang chi a nih loh hram ka beisei," tiin a sawi.

Rio Open-ah hian kum 2022 khan Alcarz hi a champion a, season hmasa khan pahnihna a ni bawk. Tun hnaiah hliam vangin a buai fo a, thla thartir lama Rafael Nadal nena The Netflix Slam an khelh tur atan pawh a dinhmun a chiang ta lo.

March thla hian Indian Wells khelh a ni dawn bawk, world number 2 Alcaraz hi champion lai niin nomawi hum a duh dawn, mahse hliam a neih leh tak avangin a hma hun sawi lawk a harsa ta hle a ni.