Tlawm tum lo Liverpool an kal zel

Nilaini zan khan Premier League inkhel pakhat a awm a, Premier League hmahruaitu Liverpool chuan champion ngei an tum tih pholangin, Luton Town chu 4-1 in an sawp.

Liverpool-in hliam vangin senior player pakua ngawt chhawr thei lo mah se, harsatna an tawk lo a, mikhual Luton Town-in Chiedozie Ogbene hmangin goal hmahruai khung zet mah se, captain Virgil van Dijk, Cody Gakpo, Luis Diaz leh Harvey Elliott hmangin Reds hian an chhanglet.

Jurgen Klopp-a nauten hnehna an chan avangin Premier League table chung berah an awm chhunzawm zel a, match 26 aṭanga point 60 hmuin, anmahni hnaih bertu Manchester City aia an sanna chu point li a ni - match khatin an khel tam thung.

Reds hian Pathianni zanah League Cup final an khel zui dawn a, Chelsea nen champion an inchuh dawn. Jurgen Klopp-a naute tan match pawimawh khelh hmaa 4-1 a hnehna chan hi 'duhthusam' tih hialin a sawi theih ang.

Anfield a ngui

Reds tan player langsar engemaw zat inlan thei lo mah se, Anfield-a inkhel an ni a, Liverpool ṭantuten hlauhthawnna an nei lo. Mahse, Premier League kai thar Luton Town-in vanneih theih an inbeisei a, minute 12-naah goal an khung nghal.

Tahith Chong-a shot chu Alisson aia inlan Reds goalkeeper Caoimhin Kelleher chuan dang mah se, a dang per a, a per lehlam hi Luton tan winger Ogbene chuan goal-ah a chantir a, Anfield thawm chu reh tak a ni.

Kum 1992 hnua a vawi khat nan Luton-in Anfield-ah goal an khung a, fan-ten beiseina an nei hman. Mahse, tun season Premier League-a goal kua khung tawhtu Elijah Adebayo tel loin an tlarhma a hriam tawk lo a, an chance neih dang an chhawr thei lo.

Hetihrual hian Liverpool lamin chance an insiam fo chungin goal an khung thei bik lo a, Luis Diaz leh Cody Gakpo ten chance ṭha bik hlahin, goal dang lut loin chawlhlawk an hmang. Reds fans an ngui a, Luton bakah City leh Arsenal fan-ten an elpui chak lo lai hmuh an inbeisei thung.

Hei le Liverpool

Team ṭha zawk, mahni muala khel an ni miau a, Liverpool-in second half-ah an zia tak tak an chhuah. Minute 56-naah Alexis Mac Allister-a corner aṭanga ball kal chu Van Dijk chuan chiang zetin a tauh lut a, 1-1 a ni.

Merseyside club an phur laklawh. Minute hnih a liam a, Conor Bradley-a 'throw-in' aṭanga ball kal chu Mac Allister chuan Gakpo tan a siamsak a, Dutch forward hian an hmahruaina goal ni turin a tauh lut - Anfield pawh an hlim ve leh ta.

Reds hian an nawr zui a, an duhtawk lo. Minute 71-naah Diaz a vannei ve ta nge nge a, Colombian forward hian ṭha taka ball a tlan luhpui hnuah, chiang zetin goal-ah a khung - goal-a shot a neih vawi kuana chiah a ni.

Minute 90-na a ni a, a la tawp lo. Reds tana a match 100-na kheltu Harvey Elliott chuan kut ruak maia stadium chhuahsan aiin, an goal lina a khung a, goal nen a career-a match chhinchhiahtlak chu a mangṭha.

Hliam karah pawh

Liverpool-in hliam vangin player pakua an chhawr thei lo mek a, Alisson, Trent Alexander-Arnold, Diogo Jota, Mohamed Salah, Thiago, Dominik Szoboszlai, Joel Matip, Curtis Jones leh Darwin Nunez an ni.

Player-te hming hi en vang vang ila, buaina tham a ni. Mahse, heti zat player inhliam an nei chungin Luton Town an sawp a, Jurgen Klopp-a nauten nomawi chawi châka an tuihalzia thiltih hmangin an pholang.

Reds tana bul ṭantu zingah centre back Jarell Quansah chu kum 21 mi a ni a, Conor Bradley (kum 20), Ryan Gravenberch (21) leh Harvey Elliott (20) te pawh an la naupang viau a, kum 18 mi Jayden Danns chu minute 89-naah bench aṭanga luhtir a ni a, Liverpool tana a match hmasa ber a khel.

Reds tana bul ṭantute kum zat hi chawhrualin kum 25 leh ni 68 a ni a, February 2018 hnua Reds tana bul ṭan naupang ber record an siam. Bench lama Liverpool player zingah panga chu kum 19 hnuai lam an ni a, kum 16 mi midfielder Trey Nyoni pawh bench-ah a ṭhu!