Player 11 kan neih chhung chu theihtawp kan chhuah zel ang - Jurgen Klopp

Hliam ngah Liverpool boss Jurgen Klopp chuan player 11 an neih tlin chhung chu theihtawp an chhuah zel tur thu a sawi a, German coach hian nomawi chawi loa Liverpool-a a season tawp ber mangṭha a duh lo.

Reds hian Alisson, Trent Alexander-Arnold, Diogo Jota, Mohamed Salah, Thiago, Dominik Szoboszlai, Joel Matip, Curtis Jones leh Darwin Nunez chu hliam vangin Luton Town lakah an chhawr thei lo.

Player ṭhenkhat hi chuan Pathianni zana Chelsea nena Carabao Cup final an khelh tur an khel thei dawn lo chiang a, a bik takin Salah leh Nunez dinhmunin ngaihven a hlawh lehzual.

Klopp chuan, "Final-ah tute nge inlan thei dawn tih chu kan nghah hret a la ngai. Mahse, Luton nena kan inkhelh hma khan player 11 kan neih chhung chuan theihtawp kan chhuah chhunzawm zel tur thu ka sawi," a ti.

German coach chuan Chelsea nena an inkhel tur thlirlawkin, "Blues lakah chak rinkai zawk kan ni ang em? Kei chuan ka ring lo. Chelsea nena kan intawn hnuah khan nasa takin hma an sawn a, a awlsam lo ang," a ti a, London club a sawi hniam duh lo.

Liverpool player inhliam zingah Jota chu thla khat aia tam chawl tur a ni a, Jones chu a ruh chuktuah nain, Alisson chu tihrawl hliam vanga chawl a ni bawk. Alexander-Arnold, Szoboszlai leh Thiago te chu chawl rei tur chiang an ni a, Salah leh Nunez-ah beiseina a awm thung.

Nunez hi Brentford lakah khan lakchhuah a ngai a, mahse, Klopp berin invenna mai a nih thu a sawi tawh a, Brentford laka bench aṭanga lut Salah-a'n goal leh assist nei nghal mah se, Luton lakah hmuh tur a awm lo.

Klopp chuan, "Salah hliam hi a hliam ngaiah khan a rawn na leh deuh a, kan ngaichang phawt ang. Thil hlauhthawnawm tak erawh a ni lo," a ti a, Salah leh Nunez hian Chelsea an hmachhawn a nih pawhin a mak lo ang.

Kum 56 mi Klopp chuan inkhel chungchang sawiin, "Ka nauten an khel ṭha takzet a, kan match khelh tawha kan tihṭhat ber pawl a ni hial ang. Ka naute khan an hun ṭha neih an bawhpelh lo a, inzirtir nawn a ngai lo - kan fan-ten kan chunga rinna an nghah phawt chuan he club hian thil ṭha tizel turin theihna a nei a ni," a ti a, a player-te a ring tawk hle.