LPS Cup - Chanmari an tla nghal!

Mahindra XUV 300 LPS Cup Inter Village Football Tournament 2024 chu nimin khan khelh chhunzawm a ni a, football thiam veng tia hriat ṭhin Chanmari chu Aibawkin an pet chhuak!

Nimin chawhnu khan Ramhlun Sports Complex-ah Chanmari leh Aibawk hi intawngin, hun pangngaiah 1-1 in an inhnehtawk - Chanmari tan Michael Lalhruaitluanga chuan goal hmahruai khung mah se, Aibawk lamin Ronghinglova hmangin an chhanglet a, hun tawp thlengin goal dang a lut tawh lo. Penalty hmangin chak zawk zawn a ni zui a, Aibawk hian 5-4 a hnehna changin Chanmari an hneh.

Tualchhung football-a hming langsar ni reng ṭhin Lengpui pawhin awlsamin hnehna an chang bik lo. Ramhlun Venglai lakah Richard Vanlalthuama leh Larry Lalrinawma (penalty) hmangin vawi hnih ngawt hmahruai mah se, RVL hi Amosa Lalhumhima leh C. Lalrinhlua hmangin an sut tir ve ve a, India international hlui Lalchhuanmawia Fanai hoa khel Lengpui hian penalty-ah 4-2 in hnehna an chang hram.

Hetihlai hian Durtlang ran tan erawh kawng harsa a awm lo. 1st Bn. MAP Ground, Armed Vengah tlangnel taka inkhelin, Maubawk chu 4-0 ngawtin an sawp a, Lalthanzama chuan goal hnih khungin, Lalrinsanga leh Joseph Lalsanglura ten goal khat ve ve an khung thung.

Dintharin Mizoram football powerhouse-a chhiar tlak an la ni reng tih an pholang a, Tanhril chu 3-0 in an hneh. Dinthar tan veteran striker Samuel Laltlanthanga bakah Michael K. Lalhriatpuia leh Francis G Lalbiakdika ten goal khat ve ve an khung ve bawk.

Kanan leh Lungleng I inkhelah goal 12 ngawt a lut a, Lungleng lamin goal kua an khung - Kanan lakah 9-3 ngawtin an chak a, Lungleng tan Rampianmawia chuan hattrick siamin, goal nga ngawt a khung. Laltlansanga, Lalrammuana leh Zonunsanga ten goal khat ṭheuh an khung ve bawk a, Kanan tana Joshua ZD Lalfakzuala goal hnih khung leh K Hmingthanzuala goal khung chu mualpho zualpui khuhna chauh an ni.

Nimina Ramhlun Sports Complex-a inkhel hmasa berah Zemabawk North pawhin harsa loin hnehna an chang a, second half-a T.Shalomlala leh Peter Lalrinhlua goal hmangin Dawrpui Vengthar chu 2-0 in an hneh a ni.

LPS Cup hi vawiinah khelh chhunzawm tur niin, 1st Bn. MAP Ground, Armed Veng leh Ramhlun Sports Complex-ah te match thum ve ve inkhel a awm leh ang.