Porto mualah Arsenal an chak lo

Arsenal tan Champions League hi thil awlsam tak a ni lo - Mikel Arteta naute hi UCL last 16 first leg khel turin Porto mualah an lenglut a, hun tawp dawnah goal chhuahin 1-0 in an chak lo.

Gunners zinkawng a tawp tihna erawh a la ni bik lo. March 12, Thawhlehni zan hian Emirates Stadium-ah second leg an khel leh dawn. Champions League-ah hian 'away goal rule' hman a ni tawh lo, tlang tur erawh chuan goal khat aia tam khung ngei a ngai dawn.

Goal khung lo

Tun hnaiah Arsenal hian goal khung an thei em em a, striker pangngai chhawr lo chung pawha an chet ṭhat em avangin fak an hlawh. Mahse, Porto lakah erawh inkhel thunun tak chung siin an khung lo, target zawna pet pawh an nei lo.

William Saliba leh Kai Havertz ten corner aṭangin an tauh lut teuh hle, mahse goal hrulah a kal liam. Declan Rice-a ball pek chu Leandro Trossard-a'n remchang insiam mah se a khung thei bik lo bawk.

North London club hian kum 2017 hnua a vawi khat nan UCL knockout stage an khel leh chauh a ni a, an tan thil a awlsam lo. UCL hi chuan boruak hran a nei a, second leg-ah chuan result ṭha neih theih an beisei ang.

Goal mawi

Anmahni khelmualah chuan Porto hi zuam sual theih tak an ni. Nico Gonzalez-a'n hnai tak aṭangin bar a pet per dawp a, ball lo let hi Spanish midfielder bawkin chang fuh leh mah se mak tak maiin goal zawnah a pet lo.

Hun tawp dawnah erawh Portuguese hun a thleng, box pawn la hla deuh takah Galeno-a'n ball a chang, goalkeeper David Raya chu a lo tawlh hma hret tih a hmu - Brazilian winger hian goal kilah pet thutin a lut mawi taket.

Goal khungtuin fak a phu, an chak chhan pawh a ni. Chutihrualin, Porto tlarhnunga kum 40 mi Pepe leh a ṭhiante pawhin fak an phu ve bawk. Premier League match hnuhnung pahniha goal 11 khungtu an dangchat thei a ni.

Inzir a ngai

Thlasik chawlh an hma hnuah Arsenal hian a zawnin match nga hnehna an chang a, inrintawkna sang tak nen Portugal hmar lam an pan - an beiseina sang viau mah se an tlawm a, hna hautak an hmabak dawn.

Arteta chuan, "A tawp kan khar dan kha pawi ka ti hle. A bik takin first half kha kan khel chhe zual, Porto tlarhnung tan hnawksak leh hlauhawm kan siam hleithei tlat lo, tun aia kan hriam lehzual zawk kha chu a ngai.

"A awlsam zawnga sawi dawn chuan, quarterfinal thlen kan duh a nih chuan kan chak a ngai. Tuna kan thil tawn aṭang hian kan inzir ang," a ti. Arsenal player tam zawk hian UCL last 16 an la khel ngai lo, zir tur an la ngah hle.

Arteta a chhang

Ball chang tlem zawk ni mah se Porto an chak a, hnehna an chan hnuah Porto coach Sergio Conceicao chuan, "Mikel Arteta hi Pep Guardiola hnuaia inzir chhuak a ni a, a inzirna hi manager ṭha leh nomawi tam tak chawi tawh pawh a ni.

"An ngaihdan chuan ball chan tam a, goal khung tam kha football ṭha a ni. Mahse, football khelh dan phung leh ngainzat zawng a inang vek lo a, player neih dan a zirin khelh dan phung tihdanglam a ngaih chang pawh a awm.

"A pawimawh ber chu a tawpa a chak zawk nih a ni. Thiam tak maia mahni goal vente pawh hi a hmuhnawm a, a pawimawh tak laia goal neih phei chu a hlu lehzual," tiin a naute khelh danah a lungawi hle.