Setien-a enkawl Barcelona

Pathianni zan dar 1:30 hian Barcelona leh Granada te an inkhel dawn a, Quique Setien hnuaia Catalan club inkhel hmasa ber a nih avangin ngaihven a hlawh ang. 

La Liga match 19 khelh tawhah Barcelona hi hmahruaitu an ni a, chuti chung chuan Ernesto Valverde-a'n a hna a hum zo lo. Barca-in point 57 hmuh theih aṭangin point 40 chauh an hmu a, an point hloh zat a tam vang bakah khelmualah entu leh club hotu mit an tlung lo. 

Goalkeeper Marc-Andre ter Stegen leh thiampuipa Lionel Messi te chungah thui takin an innghat a, manager thar Quique Setien hnuaiah game nung ṭha an beisei ang. Kum 61 mi Setien hian nomawi la chawi lo mah se Johan Cruyff leh Pep Guardiola te hnuaia Barcelona khelh dan atchilhtu a ni a, team din tharna kawngah pawh tun hmaa an khelh ṭhin danah an let a rinawm. Amaehrawhchu, Setien hian hliam vangin Luis Suarez a chhawr thei rih dawn lo a, hrem tuar Frenkie de Jong tel loa an khelh a ṭul bawk.

Ṭum dang ang thoin Lionel Messi-a'n hmun pawimawh a chang dawn a, en châkawm erawh team anga an khelh dan a ni dawn. Inkhelhna hmun tur Nou Camp a nih avangin Barcelona chak tura rinkai an ni dawn a, chutihrualin chak satliah a tawk dawn lo - mawi taka an khelh a ṭul dawn. Zanin hian Spanish Super Cup champion Real Madrid chuan Sevilla an mikhual dawn, Barcelona aia an khelh hma avangin hmahruaina hun ṭha an nei. 

Zinedine Zidane-a'n hrem vangin Eden Hazard leh Karim Benzema te a chhawr thei dawn lo a, captain Sergio Ramos pawh ngalrek hliam vangin a dinhmun a chiang lo. Jeddah, Saudi Arabia-a Super Cup khelhnaa zin ve lo Gareth Bale erawh bul ṭan thei dinhmunah a ding thung.