Mipui puihna nei ṭha Arunachal an tlo

FIFA Santosh Trophy 2024 final round thlengtu Arunachal Pradesh-in match hmasa berah Goa an hmachhawn a, point khat hlu tak an hlawh chhuak. February 21, Nilaini zanah inkhel entu an ṭhahnem a, mipui 15,000 lenna Golden Jubilee Stadium, Yupia mawi tham mipui an pung khawm.

Arunchal Pradesh hi team nem zawka ngaih ni mah se mahni muala khel an nih avangin Goa nen hian an inkhel tawk hle. Goa-in Necio Fernandes hmangin minute 20-naah khung hmasa mah se Rahul Singpho (25') leh Tame Agung (62') te goal hmangin Arunachal-in an lehthal.

Amaherawhchu, Arunachal goalkeeper Jagom Loyi a chefuh tawk lo a, Mahammed Faheez-a'n keeper hi pet khumin minute 73-naah si phurh a sut. Goa an phur zui a, minute thum hnuah Joshua D'silva hmangin hma an hruai.

Goa chak turah an inngai a, an rin ang ngawt erawh a ni lo. Au phurtu nei Arunachal Pradesh-in a tawp thlengin an nawr a, injury time-ah pawh minute ruknaah Rahul Singpho-a'n ṭha zetin a tauh lut. Goal dang luh belhna hun a awm tawh lo a, 3-3 in inkhel a tawp.

Vawiin hian group A team-te an inlan chhunzawm dawn a, chawhma dar 10:00-ah Services leh Arunachal Pradesh te an inkhel ang. National Games champion team hian beisei anga bul an ṭan lo chungin Meghalaya lakah point thum an hlawh chhuak a, Zothanpuia leh a ṭhianten artificial turf-a khelh an harsat tih a lang.

Chawhnu dar 2:30-ah NorthEast derby hmuh tur a awm dawn a, point la hmu lo pahnih Meghalaya leh Assam te an inkhel dawn. Zan dar 7:00-ah Goa leh Kerala te an inkhel ang. Group stage-ah Goa hian Kerala hi an mualah 1-0 in an hneh a, final round-ah Kerala-in phuba lak an tum ang.