Napoli leh Barcelona inhnehtawk

Striker ṭha bik Robert Lewandowski-a'n goal a khung a, tunlai striker ṭha ve tho Victor Osimhen-a'n a sut thung. Napoli leh an mikhual Barcelona chu Champions League last-16 first leg-ah 1-1 in an inhnehtawk.

Nilaini zan Diego Maradona Stadium-a inkhelah goal kan hmu mai lo. Lewandowski-a'n ni danga a thai luh zeuhna ṭhin angah pawh a hlah a, minute 60-naah erawh striker goal dik tak kan hmu.

Pedri-a'n box chhunga awm Lewy hi ball a pe. Bayern Munich striker hlui hi rang zetin a insiamrem a, amah vengtu defender pahnih ten an hnaihchilh lutuk hmain goal kilah a khung daih - keeper Alex Meret-a'n a dang phak lo.

Serie A champion Napoli an duai bik lo, minute 75-naah Osimhen a inlar. Nigeria international hian amah vengtu defender Inigo Martinez a paltlang hnuin tlu deuh mah se a insiamrem nghal a, hnai angreng tawh tak aṭangin si phurh a sut.

Osimhen hian tun season-ah Napoli tan match a la khel tam lo, hliam a tuar a, hrem a nih bakah Nigeria tan Afcon 2023 khelin an ram hian final an lut. Nikum December thla hnuah Italian club tana a match khelh leh hmasak ber a ni hial.

Barcelona nen an inkhelh hma lawkin Napoli hian an coach Walter Mazzarri an ban a, amah thlaktu Francesco Calzona hoin UCL an khel nghal tihna a ni. Calzona chuan, "Hnathawh hmabak tam tak kan nei, chutichung chuan kan result hi a ṭhaah ka ngai.

"Player-te inpekna a sang a, second half phei kha chu kan khel ṭha takzet. A tawp thlengin hnehna chan tumin kan bei thei a, rilru leh tih takzeta kan beih chuan hun rei lote chhung pawhin hma kan sawn ngei ang," a ti.

First half bikah erawh Napoli an vannei. Goalkeeper Alex Meret-a'n UCL knockout stage china bul ṭan thei naupang ber, kum 16 mi Lamine Yamal, Lewandowski leh Ilkay Gundogan te khung tur ṭha takin a lo dansak vek.

Xavi enkawl Barcelona tan pawh result chhia a ni lo, minute 90 dang Nou Camp lamah an la khel leh dawn. Fans puihna an dawng ṭha lehzual tawh dawn a, tlang turin beiseina an la nei sang hle ang.

Barca manager Xavi chuan, "Tun anga kan khel thei a nih kha chuan tlang turin kan tan kawng a inhawng niah ka ngai. Goal venhim lamah leh a nawr lamah kan tiṭha thawkhat hle chuan ka hria.

"Inkhel pumpui thlir chuan hnehna chan phu zawk kan niah ka ngai. Mahse, Champions League a ni miau a, remchang pakhat lek kan pe palh a nih pawhin hremna kan tuar nghal zel mai a ni, chu chu a takin kan hmu," tiin a sawi.

Barcelona hian La Liga lamah beisei an phak lo, league match 25 aṭangin point 54 hmuin pathumna an ni mek - hmahruaitu Real Madrid an phak lohna chu point riat lai a ni. League nomawi an hum thei lo a nih pawhin UCL title an la a nih ngat chuan season ṭha bik tak a ni ang.