Bayern-in nomawi chawi loh pawi an ti lo!

Bayern Munich leh manager Thomas Tuchel te an inṭhen dawn a, mahse season tawpah chauh a ni. Bavarians thuneituten Tuchel-a hnuaia season khelh hmabak khelh pawi an ti lo a, season thar atana an rin tawh loh coach hi an ban nghal ngam loh avangin tun season-a nomawi chawi loh, pawi an ti lo, tiin a sawi theih hial.

Beiseina a chau

Bayern hian tun season atana nomawi an chawi theihna hmasa bera DFL-Supercup-ah RB Leipzig chu 3-0 ngawtin an hneh lo. DFB Pokal ni se, second round-ah FC Saarbrucken 2-1 in an hneh lo. Saarbrucken hi kum 120-a upa ni tawh mah se tun dinhmunah chuan German club tenau an ni a, German third division club an ni.

Bundesliga-ah Bayern hi kum 2013 aṭangin a zawn zatin an la champion char char a, Thomas Tuchel-a awm hma zawngin nomawi chawi turin harsatna an tawk ngai lo. Nikum khan inelna tawp nia Borussia Dortmund chetsual zarah an champion hram.

Kuminah beisei phak bakin Bayer Leverkusen an che ṭha a, hetichung hian Bayern tan nomawi chawi hi harsa lo tura ngaih a ni. Mahse, Bayern hian an elpui ber Bayer Leverkusen hi 3-0 ngawtin an hneh lo a, team tenau Bochum lakah 3-2 in an chak lo. Khelh zat inangah Leverkusen hi point riatin an pha tawh lo.

Champions League-ah last 16 inpetkai mah se Lazio lakah khualmualah 1-0 in an tlawm a, Allianz Arena-ah an khelh dawn avangin quarterfinal thlen theihna kawng a inla inhawng zau. Mahse, tuna an khelh dan thlir chuan champion beisei ngam a har.

Match thum, inkhel pawimawh vek a, a zawn zata an chak lo chunga Thomas Tuchel an ban lo hi thilmak a tling. Bavarians hian Chelsea leh PSG manager hlui Tuchel-a chungah zahngaihna an lantirah a ngaih theih.

Squad ṭha tawk lo!

Bayern Munich hian Hansi Flick-a hnuaiah kum 2020 khan Champions League nomawi an chawi a, Germany chauh ni loin khawvel ngamtu an ni. Flick-a hnuaiah Bavarians an che ṭha a, an dai chin apiang an ram a ni per - Barcelona meuh pawh an sawp.

Flick a chhuak a, Julian Nagelsmann-a awm hnuah pawh Europe awp thei tawh lo mah se Germany awptu an la ni tho. Nagelsmann-a awm hnua player chhuak langsar chu David Alaba leh Robert Lewandowski te an ni a, Lewy meuh a chhuah hnuah pawh Bundesliga-ah an la champion.

Tuchel-a hoa season bul an ṭan hmasak berah Kim Min-jae chu euro maktaduai 50 ngawtin an lalut a, khawvel striker langsar ber zinga mi Harry Kane pawh euro maktaduai 100-in an lalut. Lewy thlakna tur an nei a, Alaba thlakna tur an nei bawk.

Heng bakah hian team tana ṭangkai nghal thei tur Raphael Guerreiro, Eric Dier leh Sasha Boey te an lalut. An player neihsa te thlir telin Bayern hi Bundesliga-a champion nawn turin an squad a chhah ṭha tawk. Mahse, inhliam vang a ni thei a, Tuchel-a player thlan fuh tawk loh vang a ni thei a, Bavarians squad a ṭha tawk si lo.

Tu nge mawhphurtu?

Bayern-in Tuchel an lakluh dan a fuh tawk lo a, international break laiin player-ten an coach ngainat Nagelsmann-a ban thu an hria a, mak an ti hle. Bul ṭan dan a fuh lo a, an buai chhunzawm zel tiin a sawi theih.

Tuchel hian Bayern-a senior player-te hi a hmin zo lo, a tih theih bawk. German coach hian Thomas Muller hmun pawimawh a chantir lo a, Bavarians-ah Muller-a dah pawimawh lo coach an dingchang ṭhin lo. Chutihrualin Muller hi a kum a upat ve tawh avangin Tuchel hi dem theih a ni kher lo ang.

Mahse, Tuchel hian Muller chauh ni loin tawnhriat nei ṭha player dang Johsua Kimmich leh Matthijs de Ligt te pawh Allianz Arena-ah an hlim lo. Kimmich leh De Ligt te hi nipui bazarah chhuak thei dinhmunah an ding a, wing back ṭha Alphonso Davies pawh Real Madrid nen sawizawm a ni.

A tawi zawng chuan Tuchel hian Bayern-ah 'team' a la din lo a tih theih. Chelsea-in hun lo taka Tuchel an ban avangin an inchhir a, Bayern erawh a hun hmaa Tuchel an lak avangin an inchhir mekah a ngaih theih bawk.

Tuchel hian khelh duh dan nghet tak a neih avangin player-te an zalen lo a, Bayern hi an ṭhat dan berin an khel lo. German coach Tuchel hian team a hmin zo lo a, season tawp ruala a contract a tawp dawn avangin player hmin a harsa lehzual ang.

Bayern hian Bayer Leverkusen lakah Bundesliga nomawi chan thei dinhmunah an ding a, mawhphurtu nia lang chu Tuchel a ni. Chutihrualin Bavarians tan insiamṭhatna hun a la awm. Xabi Alonso leh a nauten season tawpa Bundesliga nomawi an chawi a nih chuan, Tuchel a thiam loh ni loin a chunga zahngaihna lantirtu Bavarians thuneitute thiam loh a ni tawh zawk ang.